NCAA player nabalia'g bukog

CEBU, Philippines -  Gikan sa March Madness ngadto sa March Sadness.

 Usa ka makatandog sa balatian ang nahitabo didto sa NCAA men's basketball sa Lucas Oil stadium sa Indianapolis, Indiana dihang ang pointguard sa Louisville Cardinals nga si Kevin Ware mibiya sa duwa nga gikarga sa stretcher human mabali ang bukog sa tuo niyang bitiis.

 Gani tungod sa kaluoy, nanghilak ang mga players, coaches, ang mga teammates ni Ware ug ingon man ang mga players  sa Duke University Blue Devils nga maoy ilang kontra.

 Gawas nga mihilak ang mga players gikan sa duha ka kampo, wala sab kalikayi nga makahilak ang coach sa Louisville nga si Rick Pitino,  coach  sa  Duke  nga si Mike Kryzewski, ang coach sa Team USA sa London Olympics sa miaging tuig.

 Bisan og nabalian na siya, si Ware maisugon gihapon  miingon: "I'm OK. Just win the game. Win the game. Go win the game for me."

 Tuod man, wala lang modaog ang Louisville, ila pa gyung gilubong ang Duke sa iskor nga  85-63 aron moabante ngadto sa NCAA Final Four didto sa Goergia Dome unya sa  Abril 8.

 Gidala  sa Methodist Hospital si Ware ug didto gioperahan.

 Ang aksidente nahitabo sa oras nga 6:33 ang nahibilin sa first half dihang modepensa unta si Ware ngadto ni Tyler Thornton, kinsa mihimo’g tirada gikan sa three-point area. Napaluhod siya sa iyang pagtugpa ug didto nabali ang iyang bitiis.

 Nadungog sa Louisville star Russ Smith ug sa labing  suod nga higala ni Ware nga si Chane Behanan ang paghagtik sa bukog. (BANAT PALARO)