Jazz-Lakers tabla na sab

CEBU, Philippines - Mibahug og 26 puntos si Randy Foye kinsa mitabla sa iyang career-high nga walo ka three-pointers aron pangulohan ang Utah Jazz ngadto sa 116-107 nga kadaugan batok sa Brookyln Nets kagahapon didto sa Energy Solutions Arena sa Salt Lake City, Utah.

 Wala maka-ugpo niadtong duwaa ang kanhi player sa Jazz nga si Deron Williams kinsa gusto untang mopahilum sa mga fans sa Jazz ug tungod sa maong kadaugan, pabiling buhi ang kampanya sa Jazz alang sa playoffs.

Sa kasamtangan, wala pa gihapon makadaug si Williams batok sa iya kanhing team.

''I can't even explain the feeling,'' matod pa ni Foye human sa iyang record-setting nga duwa diin nahimong usa ka franchise-record-tying nga lima ka sagunson nga triples sa third quarter. Si Foye mipadayon sa pag-ingon ''It feels like your body is numb. You are just out there in your own little world. Once you touch the ball and get an open look, it's like throwing a rock in the ocean.''

Didto sa Sacramento, midaug sab ang Los Angeles Lakers batok sa Kings, 103-98 ug nagtabla na sab sila sa Utah sa 38-36 nga baraha apan ang nauwahi maoy nanag-iya sa tiebreaker alang sa ikawalong luna sa playoffs sa Western Conference.

Hinoon, mas maayong nakaduwa si Williams kagahapon kung itandi niadtong una niyang biyahe sa Salt Lake City human siya gi-trade niadtong 2011 apan wala siya makahimo pagtugbang sa three-point shooting sa Utah  ilabi na ni Foye ug ang Jazz mihimo sab og bag-ong franchise record nga 449 ka three-pointers sa usa ka season.

Kinasing-kasing nga gihangop ni Williams ang kanhi niyang mga teammates ug nakiglamano kanila sa wala pa ang duwa ug pagkahuman sab sa duwa. Iya pa ganing gigakos si Foye tungod sa dako niyang papel sa kadaugan sa Jazz apan bisan pa niana, wala gihapon ganahi ang mga fans kaniya.

Daghang nagtuo nga taga Utah nga si Williams maoy hinungdan nganong mibiya sa pwesto ang Hall of Fame coach nga si Jerry Sloan niadtong Pebrero sa tuig 2011 may duha ka semana sa wala pa siya e-trade ngadto sa Nets.

Kalabot sa mga boo nga nadawat, nagkanayon si Williams nga daan na niyang gilauman nga mas daghan pang boo sunod tuig. ''Maybe next year I'll get some boos, maybe a couple of cheers. It's good; no animosity. I don't have anything bad to say about the fans. They're going to react and think what they want to think. I can't really change that, but I've just got a lot of love for them.''

Sa laing bahin, mibahug og 19 puntos si Kobe Bryant ug mitabla sab sa iyang season-high nga 14 ka assists aron pangulohan ang Lakers.

Mihimo sab og siyam ka rebounds si Bryant. Sa maong duwa, naapsan na ni Bryant ang Laker great nga si Wilt Chamberlain (31,419 points) aron maoy mahimong ikaupat sa NBA career scoring list.

Si Tyreke Evans maoy nangu sa Kings sa iyang 21 puntos.  (BANAT NEWS)