Biagan, Gonzales midominar sa Talisay Triathlon
CEBU, Philippines - Ang kanhi national team member nga si Abet Biagan ug si Chanyl Gonzales mao ang migawas nga over-all champion sa tagsa-tagsa nila ka dibisyon sa 2nd Talisay Triathlon Race kagahapon didto sa Talisay City fish port sa may Cebu Coastal Road.
Si Biagan maoy labing paspas sa men’s class human niya gitapos ang sprint distance sud sa usa ka oras, syete minutos ug singko segundos, gisundan ni Ian Rusiana nga maoy second placer sa oras nga 1:07:22.
Milublob sa ikatulong dapit ang kanhi over-all champion sa miaging tuig nga si Kristiane Lim sa oras nga 1:08:53.
Sa iyang bahin, si Gonzales maoy reyna sa women’s open sa oras nga 1:26:02 batok sa mga runner-ups nga sila si Louie Villacin (1:26:02) ug Loveleineil Casidsid (1:31:12).
Midaog ang managsuong sila si Nyka ug Nyko Archival kinsa maoy first ug third placer sa kids division, samtang misuksok sa ikaduhang dapit si Ella Stevens.
Si Aaliah Mataragnon maoy midaog sa 11-12 class, samtang ang trio nila swimmer Keith Ocampo, cyclist Pin-Pin Uy ug runner Mary Joy Tabal maoy naghari sa relay event.
- Latest
