Casimeromilampos sa iyang depensa

CEBU, Philippines - Atubangan sa gatusan ka mga Panamanian fans, gipakita ni Johnriel ‘Quadro Alas’ Casimero ang iyang abilidad human niya depensahi ang iyang IBF light flyweight title batok sa hometown boxer nga si Luis Alberto Rios kagahapon didto sa Panama City.

Minus ang aksiyon sa maong away nga miresulta sa pag-‘boo’ sa pipila ka mga fans, apan nakita nga si Casimero ang mas nakapasud og daghang kumo itandi ni Rios kinsa naglisud pag-igo sa idlas nga Filipino boxer.

Human sa dose ka hugna nga binukbukay, tulo ka mga hurado ang mihatag og 119-109, 119-109 ug 118-110 tanan pabor ngadto sa pambato sa Omega Boxing Gym.

Kini ang ikaduhang malampusong title defense ni Casimero human niya makuha ang bakus niadtong miaging Pebrero 2012 dihang iyang gipaundang sa 10th round ang Argentinean nga si Luis Lazarte didto sa Argentina.

Sa pakighinabi sa Philboxing.com, ang Cebuano boxing promoter nga si Sammy Gello-ani mipadayag sa iyang pagmaya sa kadaugan ni Casimero ug nagtuo nga mipakita og nindot nga performance ang iyang boksidor bisan pa og didto kini miaway sa balwarte sa kontra.

Sa maong kadaugan, ang garbo sa Ormoc City nga si Casimero mipalambo sa iyang rekord ngadto sa 18-2, 10KOs, samtang si Rios nakahiagum sa ikaduha niyang pilde sud sa 21 ka away.

Sa supporting main event, miresulta sa draw ang binukbukay tali sa Filipino contender nga si Mark John Apolinario ug Panamanian nga si Roberto Vasquez. Ang maong away alang unta sa interim WBA bantamweight title.