Sabillo bag-ong world champion

CEBU, Philippines - Milampos ang ALA boxer nga si Merlito ‘Tiger’ Sabillo pagsakmit sa interim WBO minimumweight champion pinaagi sa pag-undang sa Colombian nga si Luis De La Rosa sa eight round kagahapon didto sa Coliseo Mario De Leon Cerete sa Colombia.

Sa taho sa Fightnews.com, si Sabillo ug De La Rosa isug nga nakigsinumbagay sa usag-usa sugod sa first round, apan ang 29-anyos nga si Sabillo ang mipakita og grabeng determinasyon nga mudaog human niya gipatumba si De La Rosa sa eight round.

Si De La Rosa kinsa nagkadugo tungod sa gisi niini sa kilay mibarug aron ipadayon ang away, apan ang garbo sa Toboso, Negros Occidental daling miatake aron patumbahon ang Colombian sa ikaduhang higayun.

Misuway pagbarug si De La Rosa, apan tataw kaayo nga kulatado na siya ug mipakita na og kaluya rasun nga giundang sa referee' ang away sa 2:58 sa ikawalong round.

Sa maong kadaugan, si Sabillo pabiling walay pilde sud sa 21 ka away, 11 sa daog niini nagagikan sa knockout, samtang si De La Rosa nakahiagum sa ikaduha niyang pilde sud sa iyang 23 ka career fights.

Si Sabillo mao karon ang mandatory challenger alang sa WBO regular title nga kasamtangang gihuptan ni Moises Fuentes sa Mexico, apan may kahigayunan nga siya ang mahimong regular champion kun ugaling ibakante na ni Fuentes ang bakus aron makig-rematch ni light flyweight champ Donnie Nietes.

Laraw ni Fuentes nga makig-rematch ni Donnie 'Ahas' Nietes human siya mapakyas pagsakmit sa WBO light flyweight title human sa controversial majority draw niadtong Marso 2 didto sa Waterfront Cebu City Hotel and  Casino.