Inter-Club bootfest himuon sa tulo ka binyu

 CEBU, Philippines - Ang Cebu City Sports Center ug ang Aboitiz Sportsfield ug San Roque field sa barangay Subangdaku sa Mandaue City maoy tulo ka binyu alang sa Cebu Inter-Club Football Cup nga gikatakda sa Mayo 18-26.

 Gidapit sa organizing Cebu Amateur Football Club (CAFC)-Queen City United (QCU) ang top football teams/clubs lukop nasud  sa pagsalmot ning tinuig nga torneyo nga giisip nga usa sa labing dakung soccer tournaments gawas sa Manila.

 Hinuon, ang organizers molimit lang ngadto sa 10 ka teams sa matag dibisyon nga nalatid ning usa ka semana nga torneyo ubos sa bendisyon sa Cebu  Football Association (CFA).

 Mga kategoriya nga tigian mao ang men's and ladies open, 40-above, boys and girls 18 and 15-under, boys 13and 11-under ug ang mixed 11-under.

 Gawas lang sa 11-under division, ang ubang mga kategoriya mahimong mopaduwa og labing daghan 25 ka players.

 Ang entry fee nagkantidad og P5,000 alang sa men's open ug 40-above, P1,500 sa ladies open, P1,000 sa 11-under ug P1,200 sa ubang mga age groups.

 Alang sa dugang mga kasayoran, mahimong mokontak ni Greg Balsicas sa 0923-7113100 ug Francis Ramirez sa 0923-4541353 o sa 0929-348-9009.  Mahimo sab mo-email sa CAFC sa [email protected]. (BANAT PALARO)