CCBI naka-ikyas batok PhilHealth
CEBU, Philippines - Halos tanan ganahan sa PhilHealth apan dili ang CCBI ilabi na kung baskeball ang hisgotan.
Mao na sa ginhawang paningkamot sa Chamber of Customs Brokers, Inc. (CCBI) quintet aron maka-ikyas batok sa PhilHealth ug mga krusyal nga baskets nilang Daniel Enriquez ug Gilbert Real maoy nagsalbar kanila ngadto sa 97-94 nga kadaugan sa miaging weekend sa nagpadayong HoopStars Corporate League didto sa J Centre Mall rooftop gym sa dan A.S. Fortuna sa Mandaue City.
Si Enriquez mao na sab ang nangu sa 4-0 nga CCBI sa iyang 16 puntos.
Midugang si Kenneth Kern Sesante ug 14 puntos alang sa CCBI samtang midugang ug nagsunod nga puntos silang Real, Tata Laborte ug Ramil Aninon sa ilang 12, 11 ug 10 puntos, matag usa kanila.
Human mapukan ang PhilHealth, duna na lay duha ka lig-on nga kontra ang nagpabilin nga posibleng mosuway pagpakgang sa CCBI ug kini mao ang 3-0 nga Albert Surplus ni Dexter Caballero ug Innodata nga nasakop sa Group B kauban sa CCBI ni coach Caleb Gawangon.
Malipayon sab sa ilang naangkon nga 4-0 ang team owner nga si Ding Abay-abay ug team nanager nga si Rady Abarintos.
Ang PhilHealth duna say labing menos tulo ka kanhi varsity players nga silang Michael Cenabre, Randy Pogoy ug Marlon Demape apan wala sila makapiog sa taga CCBI nga gilangkuban sab ug mga kanhi varsity ug mga personeros sa mga Customs brokers.
Puntos matag usa:
CCBI (97)—Enriquez 16, Sesante 14, Real 12, Laborte 11, Aninon 10, B. Medalle 9, Moral 7, Rollon 4, Elloren 4, Abellana 4, Palero 2, Maningo 2, Villaronza 2
PhilHealth (94)— Arco 23, Cenabre 15, Pogoy 14, Demape 11, Quinanola 11, Campos 7, Sasing 6, Ramas 3, Yap 2.
- Latest
