Bantayan Beach Games gitakda sa Marso 28-30

CEBU, Philippines -  Nagkadaiyang kalihukan ang gihan-ay  ning tuiga  alang sa Bantayan Beach Games  nga gikatakda sa Marso 28-30 didto sa Sugar Beach Resort sa Santa Fe, Bantayan island.

 Ang pinaka-highlight sa tinuig nga kalihukan mao ang final leg sa Cebu Loves Tri Team Championship Series.

 Gawas sa triathlon, adunay individual time trial sa tanang seklista ingon man Oceanman niadtong gusto molangoy ug dagan.

 Ang kiddie triathlon ug ang super sprint gitakda sa Marso 28. Pagka-ugma himuon ang third ug final leg sa Cebu Loves Tri Series diin ang mga partisipante magtigi sa 1.5 kilometer swim, 40k bike ug 10k run.

 Gawas sa team ug relay event, ang top individual performers sa nagkalain-laing age-category ilhon sab nga mananaog.

 Sa katapusang adlaw, mao ang 13-kilometer ITT, sundan sa Oceanman.

 Alang niadtong interesadong mosalmot, mahimo na nga makaparehistro didto sa Rudy Project sa Ayala Center-Cebu. (BANAT SPORTS)