CCBI mipukan sa SMY sa Corporate League

CEBU, Philippines -  Mipakita dayon og maayong labok ang Chamber of Customs Brokers Inc. (CCBI) sa ilang "debut" dihang ilang gikunis-kunis ang SMY Packaging, 87-42   HoopStars 2013 Corporate League niadtong Miyerkules sa gabii didto sa J Centre Mall roofdeck court sa A.S. Fortuna St., Mandaue City.

 Giisip nga labing  paboritong kontender sa Bracket B, ang CCBI adunay lima ka players nga miiskor og double figures nga gipangulohan ni ex-UC Webmaster Daniel Enriquez sa iyang 16 puntos.

 Mao kadto ang duwa nga ang kanhi UC star nga si Kenneth Kern Sesante dili na maninguha'g  pamuntos kay maoy iyang gipalabi nga maayong pagka-katag ang bola isip usa sa labing iladong playmaker sa maong torneyo.

 Silang Enriquez, Sesante, ex-Jaguar pointguard Gilbert Real ug ex-CIT center Ramil Aninon maoy mga kanhi varsity players nga naghan-ok sa CCBI   line-up ni coach Caleb Gawangon.

 Sa lagda sa HoopStars, gitugtan  nga makaduwa ang mga kanhi varsity players basta dili lang sila aktibong commercial players.

 Si Noel Medalle  miamot og 12 puntos  alang sa CCBI, samtang sila si Francis Palero, Takloy Moral ug Tata Laborte mihipos og 10 puntos matag usa.

 Bugtong si Jordan Alano lang ang miiskor og double figures alang sa SMY sa iyang 10 puntos.

PUNTOS MATAG USA

 CCBI (87) - Enriquez 16, Medalle 12, Palero 10, Moral 10, Laborte 10, Elloren 8, Aninon 7, Abellana 6,

Sesante 4, Real 2, Villaronza 2

  SMY (42) - Alano 10, Balo 7, Nadera 4, Puyot 3, Gerona 3, Alino 3, Delasan 2, Perez 2, Chiu 2, Pelicano 2 (BANAT SPORTS)