UV, USC nangulo sa tanang mananaog
CEBU, Philippines - Gisugat dayon og daog ang mga pre-tournament favorites University of the Visayas (UV) ug University San Carlos (USC) atol sa pagbukas sa ThreeSixty Pharmacy Cup 2013 basketball tournament didto sa Sacred Heart School-Ateneo de Cebu Campus (SHS-AdC) gym sa Canduman, Mandaue City.
Gilubong sa UV ang Cebu Eastern College (CEC), 73-54 sa Under-16 division, samtang gilubong sab sa USC ang University of San Jose-Recoletos (USJ-R) sa iskor nga 49-28 sa Under-13 category.
Gisubhan sab og daog ang USC-North Campus batok sa USJR-A sa Under 10 age category.
Sa lain pang mga sangka, ang SHS-AdC-1 milubong sa Abellana National School (ANS), 44-25 sa Under 16 division, ang SHS-AdC-A naka-eskapo batok sa CEC sa iskor nga 55-53 ug ang UV walay puangod nga nimasaker sa SHS-AdC-B, 70-12 nga pulos ubos sa Under-13 division.
Ang CEC mipukan sa SHS-AdC sa iskor nga 36-24 ug ang USJR-A midemolis sa USC-South, 36-12 sa Under-10 division.
Sa Under 16-division B, ang USJR-B midaog batok sa SHS-AdC-2 sa iskor nga 52-47, ang Thumbs Up mikulit og 76-26 nga kadaugan batok sa CVIRAA Grade School ug ang UV-B mimakmak sa Nissi Academy, 66-24.
Sa Under 13 division B, gipanitan sa Southwestern University ang St. Benedict, 64-39 ug ang Punta Princesa Children Basketball Association ang USJR-B, 81-8.
Ang ThreeSixty Pharmacy Cup 2013, maoy ikaunom nga season nga gipasiugdahan sa Cebu Youth Basketball League ug gisalmotan og 45 ka teams ubos sa upat ka lain-laing age groups.
- Latest
