CEBU, Philippines - Gipatapsingan sa Team Charlie nga gipangulohan ni Richard Gubaton ang mas paboritong Team Golf sa iskor, 74-73 sa usa ka kulbahinam kaayong duwa kaniadtong Sabado aron mokulit sa ilang ikalimang daog sulod sa pito ka duwa sa pagtapos sa first round sa Center Katipunan A. Lopez Christian Organization (CEKALCO) 2013 second season basketball tournament didto sa A. Lopez open court sa barangay Labangon, ning dakbayan.
Naglabaw ang Charlie sa iskor, 24-19 sa opening period pinaagi sa pagtimon nilang Coronel Baculi ug Dodong Soco apan dali kining naapas sa Golf didto sa second period ginamit ang 17-10 scoring run aron molabaw sa halftime, 36-34.
Gikan niadto, kanunay nang sikit ang duwa sa kinatibuk-ang second half diin nagbanos-banos na sila'g labaw ug makadaghang higayon kining nagtabla dihang kalit lang giharian ang point guard sa Charlie nga si Gubaton kinsa mi-iskor og sagunson 10 puntos sa fourth period lakip ang usa ka lay-up aron makaginhawa og luag ang Charlie.
Ang usa ka free throw ni Bert Besties sa daginutong oras, maoy naghatag sa Charlie ug kuatro puntos nga abante, 74-70 aron pagselyado sa maong kadaugan diin naghupot na sila'g 5-2 nga baraha.
Ang three-pointer ni Eduard Barellano sa kataposang siete segundos, igo lang nagsilbeng garbage shot alang sa Golf nga maoy naghimo sa iskor, 73-74.
Miposa og 18 puntos si Soco aron pangulohan ang Charlie samtang sila si Gubaton ug Baculi parehong midugang og 16 puntos matag usa.
Ang Golf gipangulohan nilang Gino Almencion ug Kit Arellano kinsa mibahug og 22 ug 19 puntos, matag usa.
Puntos matag usa:
CHARLIE (74)- Soco 18, Gubaton 16, Baculi 16, Besties 9, Insong 6, Dolera 4, Bacho 2, Molejon 2, Panugaling 1.
GOLF (73)- Almencion 22, Arellano 19, Barellano 9, Mernado 9, Redera 4, Bentozal 4, Hortezano 4, Delos Reyes 2. (BANATSPORTS)