Sinukmagay sa Gaisano Countrymall karong gabii

 CEBU, Philippines - Dose ka amateur fights ang masaksihan sa laing edisyon sa ALA-Summit Natural Drinking Water Fight Night Amateur Boxing Series karong gabii didto sa Gaisano Countrymall carpark.

 Mga amateur standouts gikan sa nagkadaiyang tunghaan ug boxing clubs ang magsinukmagay nga sugdan sa alas-6 sa gabii.

 Ang mga pambato sa University of Visayas (UV) Boxing Team nga sila si Romel Tuñacao, Richie Montealto, Dann Lou Codilla, Melvin Besinga ug Robert Eturma makigsinukliay og mga kumo batok sa tagsa-tagsa nila ka mga kaatbang.

 Si Tuñacao makigsangka ni Marco Pumar sa Talisay City, si Montealto makigbatok ni Kevin Jake Catajara, si Codilla makigsinukmagay ni Cherwillan Cantel sa Cabancalan National High School ug si Besinga mosukod sa abilidad sa iyang teammate nga si Eturma.

 Angay sab nga atngan ang away ni Polid Banal, manghod ni ALA Boxing superstar AJ Banal nga mopakita'g aksiyon batok ni Christian Bacolod.

 Mokompleto  sa fight card mao ang sangka ni Ivan Candol batok Steven Mondragon, Rio Deguma batok Jonas Herberto, Dominique Castañares batok Richard Rama sa Philippine Australian Boxing Club, Rhezon Tarona batok Kit Graces ug Eleno Traya batok Mardie Mauna. (BANAT NEWS)