CEBU, Philippines - Bugtong tuyo sa Smart Gilas national team mao ang pag-angkon og luna sa finals sa 19th Super Keung Sheung Cup International Invitational Basketball Championship.
Ang Phl-Smart Gilas makigharong sa Changsha Park Lane sa semifinals karong adlawa didto sa Queen Elizabeth Stadium sa Wanchai, Hong Kong.
Ang Pilipinas maoy topseed sa Group-B human nila giharos ang tanang kaatbang nga naglakip sa Indonesia, Malaysia ug host Hong Kong.
Bisan kasagaran sa iyang players mga sakop sa Smart Gilas cadet pool, si coach Chot Reyes malaumon nga makuha nila ang kampiyonato sa maong torneyo nga usa sa ilang tune-up tournament agi'g pagpangandam alang sa 2013 FIBA Asia Championship sa Agosto.
Ang Smart Gilas magsalig sa ilang naturalized center Marcus Douthit uban sa duha ka PBA players nga sila si Gary David ug KG Canaleta.
Uban usab nila ang mga sakop sa cadet pool ug kanhi collegiate standout sama nila ni Greg Slaughter, Garvo Lanete, RR Garcia ug Kevin Alas.
Sukdon nila ang talento sa batan-on ug paspas nga mga magduduwa sa Changsha Park Lane.
Kun modaog karon ang Smart Gilas, atubangon nila sa finals ang modaog sa laing semifinal match tali sa Snow Wolves ug Southern California Fukienese Association, usa ka guest team gikan sa USA.
Ang finals himuon ugma didto gihapon sa Queen Elizabeth Stadium. (BANAT SPORTS)