4 Olympic sports inalis ng Myanmar

MANILA, Philippines -  Nagtanggal ng apat na Olympic sports ang Myanmar sa mga ikakalendar­yong laro sa SEA Games na kanilang gagawin sa Disyembre 11-22 sa tatlong magkakahiwalay na lugar.

Sa komunikasyon na  ipinadala ng host country sa Philippine Olympic Com­­mittee noong Huwe­bes, nakasaad dito ang pag­kakaalis sa mga larong bad­minton, gymnastics, lawn tennis at table tennis bukod sa event na water polo.

Ipinalit sa apat ang mga sports kung saan malakas ang Myanmar katulad ng vo­vinam, tarung derajat, kempo at chinlone.

Ang naunang tatlong sports ay mga martial arts sports, habang ang huli ay isang laro sa sepak takraw.

“Noong July ay nag-approved na ang SEA Games Federation Council ng 31 sports kasama ito ng apat na Olympic sport pe­ro ngayon ay binago ni­la. Nagkaroon na dati ng usapan na hindi puwedeng alisin ang mga Olympic sports sa SEA Games ka­ya naniniwala akong iba­balik ito,” wika ni POC secretary-general Steve Hontiveros kahapon sa SCOOP sa Ka­mayan sa Padre Faura.

Isang SEAG Federation Meeting ang gagawin sa Nay Phi Taw sa Enero 28-29 at si Hontiveros ay dadalo kasama sina 1st Vice President Jose Roma­santa, 2nd VP at Chief of Mis­sion Jeff Tamayo at trea­surer Julian Camacho.

“Ang Malaysia at Singapore ay nagbigay ng liham at inirereklamo nila ang ginawang ito ng Myanmar at  naniniwala akong gagawa ng aksyon ang Federation,” ani Hontiveros.