CEBU, Philippines - Moulbo na ugma ang gikahinaman nga ThreeSixty Pharmacy Cup 2013 didto sa Sacred Heart School-Ateneo de Cebu gym sa barangay Canduman sa Mandaue City.
Adunay 46 ka koponan ang moduwa sa upat ka age-group brackets.
Sugdan ang kompetisyon human sa opening ceremonies sa ala-1 sa hapon.
Ang mga koponan magtigi sa korona sa premier Division A sa Under 10, 13, 16 ug 19 age groups.
Ilakip sab ang developmental division (Division B) sa Under 13 ug 16 age groups.
Modepensa sa ilang titulo mao ang University of San Carlos-South Campus (Under 10), Cebu Eastern College (Under 13), University of the Visayas (Under 16) ug Adgers Sportswear (Under 19).
Gilaumang mohatag og nindot nga duwa sa USC South sa Under 10 age group mao ang USC North, samtang ang reigning Visayas SBP champion ug national runner-up USC maoy paborito nga modominar sa Under 13 age group.
"We’re very grateful for this partnership between two young and upcoming entities in ThreeSixty Pharmacy and the CYBL. It’s a big boost to age group grassroots basketball which we really need to push," matud pa ni CYBL tournament director Rico Navarro.
Lain pang mga tunghaan nga mosalmot naglakip sa Don Bosco Technology Center, Sacred Heart School-Ateneo de Cebu, Southwestern University, University of San Jose-Recoletos, University of Southern Philippines
Foundation, NISSI Academy International ug Sotero B. Cabahug Forum for Literacy.
Uban nila ang bag-ong koponan sama sa Abellana National School, Cebu Bradford School, St. Benedict Childhood Education Centre, AC Sports ug ang guest teams Thumbs Up ug Punta Princesa Children's Basketball Association. (BANAT SPORTS)