PBA d-league aspirant’s cup: Elite magpapasolido sa no. 2 vs Gems

Laro ngayon

(Trinity Gym, Quezon City)

2 p.m. Fruitas vs JRU

4 p.m. Cebuana Lhuillier  vs Blackwater Sports

MANILA, Philippines - Maagang paghahanda sa taong 2013 ang sinasandalan ng Blackwater Sports para maisantabi ang hamong ipapakita ng Cebuana Lhullier Gems sa pagbabalik ngayon ng PBA D-League Aspirants’ Cup sa Trinity University of Asia Gym sa Quezon City.

“Balik-ensayo kami no­ong January 4 para magkaroon kami ng sapat na panahon para maibalik ang game-shape ng mga bata. Malalaman natin ang epekto nito sa laro,” wika ni Elite coach Leo Isaac.

Tampok na laro dakong alas-4 matutunghayan ang tagisan at nais ng Blackwater na manatiling hawak ang mahalagang ikalawang puwesto sa standings.

Sa ngayon ay mayro­ong 5-2 karta ang Elite pero kung madidisgrasya sila ng Gems ay mabibigyan-daan nila ang pahingang Cagayan Valley at Big Chill na makasalo sa pinagna­nasaang puwesto dahil may iisang 5-3 baraha ang dalawang koponan.

Makikigulo rin ang Frui­tas Shakers para sa ta­gisan sa ikalawang puwesto sa pag-asinta pa ng panalo sa inspiradong Jose Rizal University sa unang laro.

Ikaapat na dikit na panalo ang nakaumang sa tropa ni coach Nash Racela na mag-aangat sa Fruitas sa 5-3 baraha.

Bukod sa pagiging pa­laban sa awtomatikong se­mis seat, palalakasin din ng Fruitas ang hanap na twice-to-beat advantage sa quarterfinals kung manalo.

Hindi naman madaling laro ito dahil pagsisikapan din ng Heavy Bombers ang paghablot ng ikatlong dikit na panalo tungo sa 4-4 baraha para manati­ling buhay ang asam na makaalpas sa elimination round.

Sa 9-1 karta, ang NLEX ay hawak na ang isang awtomatikong puwesto sa semifinals habang ang Informatics at Erase Xfo­liant ang unang dalawa sa limang mangungulelat na koponan na masisibak sa eliminasyon.