Chalmers nagmangtas

CEBU, Philippines - Atubangan sa ilang mga fans, gimasaker sa defending champion Miami Heat ang Sacramento Kings sa iskor, 128-99 sa nagpadayong duwa sa NBA didto sa Arco Arena sa Sacamento, California.

Mikulit og career-high  si Mario Chalmers kinsa maoy nangu sa Heat sa iyang 34 puntos ug 10 niini ang three-pointers.

Midugang og 20 puntos si LeBron James alang sa Miami uban sa iyang pito ka assists ug lima ka steals ug duha ka blocks. Ang maong kadaugan mao sab ang season-high nga point total alang sa Miami kinsa wala na makahimo'g 100 puntos sa miaging upat nila ka duwa nga naglakip sa duha ka sagunson nga pilde.

Duna na sab sila'y lima ka pilde sulod sa walo ka duwa gikan niadtong Disyembre 26.

Mibahug og 16 puntos si Chris Bosh ug miamot silang Mike Miller ug Dwyane Wade og 12 ug 11 puntos matag usa alang sa Heat.

Ang 10 ka triples ni Chalmers mitabla sa franchise-record nga nahimo ni Brian Shaw ug ang iyang 10 of 13 gikan sa three-point area maoy mibuak sa kanhi record nga siyam ka treys didto sa Sleep Train Arena.

Naglabaw  og labing menos 22 puntos ang Miami atol sa halftime dihang ilang na-outscore ang Kings,  37-29 didto sa third quarter sa wala pa nila hingpit masakera ang ilang kontra.

Mihimo'g unom ka three-pointers ang player sa Kings nga si Isaiah Thomas ug mihimo sab og career-high 34 puntos pareho ni Chalmers. Miposa og 11 puntos matag usa silang DeMarcus Cousins ug James Johnson alang sa Kings.

Nagkalisod ang Heat sa ilang mga road games karon nga season diin nagiagom sila'g upat ka pilde sulod sa lima ka duwa ug kanunay nilang mabiktima sa ilang road game mao sab ang Sacramento diin ila na kining napilde sa pito ka higayon sulod sa kataposang walo nila ka panagbagat ug aduna na sila'y 8-8 nga record sa ilang road games.

Nalambigit karon sa mga init nga mga off-court news ang Kings kinsa gikatahong ibagliya na sa mga managsoong Joe ug Gavin Maloof nga maoy major owner sa Kings.

Matod pa sa taho nga ibaligya sa mga Maloof ang Kings ngadto sa usa ka grupo nga gipangulohan ni Chris Hansen ug mobalik ngadto sa Seattle diin adto na sila manukad sunod nga season.

May taho sab kagahapon nga usa ka local nga grupo ang interesadong mopalit sa Kings nga andam motukod og gym sa downtown Sacramento nga nagkantidad og  $400 million. (gikan sa NBA.com)