Kenyan runners nangharus

CEBU, Philippines - Sa makausa pa, naghari na usab ang mga Kenyan runners sa ikaupat nga edisyon sa Cebu City Marathon kagahapon didto sa Cebu IT Park sa Brgy. Apas, ning syudad.

Si David Kipsang maoy labing paspas sa men’s division sa 42k full marathon human niya gilabang ang finishline sud sa duha ka oras, 30 minutos ug 38 segundos, samtang si Irene Kipchumba maoy nag-una sa women’s division sa oras nga 3:28:28.

Sa maong kadaugan sila si Kipsang ug Kipchumba mibulsa og P60,000 matag usa.

Si Kipsang gisundan sa iyang mga kababayan nga sila si Jackson Chirchir (2:33:39) ug Douglas Mwiti (2:35:09) sa ikaduha ug ikatulong dapit.

Giubanan usab si Kipchumba sa mga Kenyan female runners nga sila si Patroper Kemboi (3:39:23) ug Susan Chepkwong (3:49:27) nga mikompleto sa top three finishers.

Sama sa 42k action, pulos Kenyan usab ang midominar sa 21k half marathon, diin migawas nga kampiyon sila si Willy Rotich ug Jacline Nzivo sa men’s ug women’s open.

Mirehistro si Rotich og oras nga 1:07:12, gisundan nila ni Dennis Isika (1:09:21) ug Eliud Kering (1:10:21).

Nakalusot hinuon ang Pinay nga si Mary Grace Delos Santos dihang mipwesto siya sa ikaduhang dapit sa oras nga 1:20:28 sunod ni Nzivo (1:18:28). Nakuha sa Cebuana nga si Mary Joy Tabal ang ikatulong dapit sa oras nga 1:21:44.

Sila si Jhean Andrin ug Joebert Carolino ang mananaug sa 5k division sa ilang oras nga 21:45 ug 17:14.