McClinton, Grosby lalahok sa Arnold Sports Festival

MANILA, Philippines - Sasali sina Luz McClinton at Gemmalyn Grosby sa Arnold Sports Festival na gagawin mula  Pebrero 28 hanggang Marso 3 sa Columbus Convention Center sa Ohio, USA.

Ang Festival ay lalahu­kan ng 18,000 atleta at magtatagisan sa 45 events at sina McClinton at Grosby ay sasali sa Arnold Amateur IFBB/NPC International Bodybuilding, Fitness, Figure, Bikini at Physique Championships.

Espesyal ang 2013 dahil sa taong ito ipagdiriwang ang kanilang ika-25 anibersaryo kaya’t inaasahan na  mas maraming tao ang da­dalo upang saksihan kundi man ay aktuwal na makipagtagisan.

Ipinapalagay na palaban sa medalya si McClin­ton matapos ang mga ta­gumpay na napanalunan sa malalaking torneo na sinalihan noong nakaraang taon.

Kilala sa taguri bilang Mama Luz, si McClinton ay kahihirang na kampeon sa World Bodybuilding and Fitness Federation (WBFF) Southwest US Championship na ginawa sa Oklahoma, USA noong Disyembre.

Sa kabilang banda, si Crosby ay isang  propesyu­nal na atleta sa IFBB at siya ay nanalo sa Arnold Schwarzenegger Classic Amateur International Bikini Class B  Championship no­ong  nakaraang taon.

Mismong si Schwarze­negger ang siyang  nagta­taguyod sa Sports Festival na itinuturing bilang pinakamalaking multi-sports fitness  event sa mundo na tumatagal ng isang linggo.