SM 2 SM run gitakda sa Pebrero 24
CEBU, Philippines - Mobulsa og P50 mil nga premyo ang makampiyon sa 21K premier division sa 3rd SM 2 SM Run nga gikatakda sa Pebrero 24 sunod tuig nga manukad didto sa SM City-Cebu grounds.
Usa unya kini sa labing dakung ganti nga madawat sa usa ka kampiyon sa kasaysayan sa lumba sa dagan dinhi sa nasud.
Dili usab magmahay ang second placer tungod kay makadawat siya og P30 mil, samtang ang third placer gantihan og P20 mil.
Ang mopuwesto gikan sa ikaupat ngadto sa ika-10 dapit makadawat og gift certificate nga P1,000 gikan sa SM.
Gawas sa 21K half marathon, laing kategoriya nga gustong daganan sa mga runners naglakip sa 12K, 6K ug 3K fun run.
Ang top 3 finishers sa 12K makadawat og P10,000, P7,000 ug P5,000 matag usa, samtang ang unang tulo ka mananaog sa 6K premyohan og P5,000, P3,000 ug P2,000 matag usa.
Ang dagan magsilbe usab nga fund-raising event diin ang makita nga kuwarta itabang ngadto sa Cebu City Task Force on Street Children ug sa Cebu Newspaper Workers Foundation (CENEWOF).
Ang registration fee nagkantidad og P750 sa 21K, P450 sa 12K ug P350 sa 6K ug 3K.
Mahimong magparehistro sa ilang online registration sa Facebook account sa SM City-Cebu o mobisita sa registration booth nga nahimutang sa SM City Northwing. (BANAT SPORTS)
- Latest
