knicks naka-ipsot batok Cavs, 103-102

CEBU, Philippines - Napakgang sa host team New York Knicks ang career-high 41 puntos gikan sa ilang bisita sa Cleveland Cavaliers nga si Kyrie Irving ug milampos ang Knicks sa pagpukan sa Cavs sa iskor, 103-102 kagahapon sa nagpadayong duwa sa NBA didto sa Madison Square Garden.

Bisan pa gani sa panahon sa Linsanity, nagpakita nga dili sayon labwan ang guard sa Knicks nga si Raymond Felton kinsa mibahug og 25 puntos alang sa Knicks samtang si Tyson Chandler midugang og 23 puntos.

Wala makaduwa si Carmelo Anthony atol sa maong kadaugan apan nanghinaut ang Knicks nga makabalik na siya'g duwa ugma diin makigtakos sila sa Houston Rockets uban ni Jeremy Lin, ang kanhi Knicks nga misikat sa angga nga Linsanity.

Tungod sa maong kadaugan, nagpabiling wala'y pilde sa ilang homecourt ang Knicks sa ilang 10-0 nga maoy ilang best start sukad sa 1991-92 diin midaug sila sa una nilang 11 ka duwa didto sa Madison Square Garden.

''Guys stepped up. Raymond played great, Tyson played great, and it was just enough,'' matod pa sa Knicks forward nga si Steve Novak.

Wala pa gihapon makaduwa si Anthony, ang no. 2 scorer karon sa NBA human mapiang ang iyang walang tikod atol sa third quarter dihang midaug sila batok sa Los Angeles Lakers.

Mibahug og 21 puntos si Chandler sa second half ug milangkat og 10 ka rebounds samtang sila si Felton ug Jason Kidd nagkumboya og 15 ka assists.

''When a guy gets that hot, there's nothing you can really do, other than just stay in front of him and make him take tough shots, which he did. He just hit great shots and we still got the win, though,'' sumala pa ni Felton.

Misumpay si Felton sa pag-ingon  ''Any time a guy comes in your building and scores 41 points and he still got a loss, then you did your job.''

Ang rookie nga si Chris Copeland mi-iskor og 11 puntos sa labing una niyang  career start isip hulip kang Anthony. Sa wala pa siya mapiang batok sa Lakers, misakmit og 30 puntos si Anthony sulod sa 22 minutos apan napiang human sa foul ni Dwight Howard.

Ang Knicks aduna nay 2-1 nga baraha bisa'g wala moduwa si Anthony.

Sa laing bahin, gipakuratan sa Chicago ang Brooklyn, 83-82.

Sa laing duwa, midaug ang Minnesota batok Dallas sa overtime, 114-106, gilubong sa L.A Clippers ang Milwaukee, 111-85, midaug ang Golden State batok sa Atlanta, 115-93, gilubong sa Miami ang Washington, 102-72, midaug ang Orlando batok sa Charlotte, 107-98, midaug ang Indiana batok Detroit, 88-77, midaug ang Memphis batok sa Utah, 99-86 ug midaug ang San Antonio batok sa Boston, 103-88. (GGM gikan sa NBA.com)