Delta, Golf 2-1 na sa CEKALCO

CEBU, Philippines - Ang Delta team ni Roland 'El Presidente' Sameon ug ang Golf team ni playing coach Irven Delos Reyes parehong mikulit og laing daog batok sa tagsa-tagsa  nilang kaatbang  sa elimination round sa Center Katipunan A. Lopez Christian Organization (CEKALCO) 2012 second season basketball tournament didto sa A. Lopez open court sa barangay Labangon, ning dakbayan.

Ang Delta ug Golf pareho karon nagbitbit og 2-1 nga baraha.

Impresibo ang pagsugod sa Delta diin kanunay nilang gidominar ang duwa aron pagpukan sa Bravo,  87-76.

Masipang 45 puntos ang gipabuto ni Julius Gutierez, lakip na niini ang lima ka triples  aron pangulohan ang Delta.

Mitampo sab si Junel Villarosa, kinsa mipabuto og 22 puntos.

Silang Tata Maspiñas ug Dondon Tenchavez maoy nangu sa Bravo sa ilang 20 ug 15 puntos matag usa.

Sa laing duwa, ang Golf mihipos og 11 puntos batok sa Echo sa iskor nga 77-66.

Milusad og 35-19 nga scoring run ang Golf nga gipangulohan sa ilang pointguard nga si Kit Arellano, kinsa mibahog og 15 puntos sa fourth period alang sa kinatibuk-an niyang 31 puntos.

Gawas kang Arellano, daku sab og natabang silang Andres Craso ug kanhi USC Warrior Ritchie Garcia nga nagkumboya og 27 puntos.

Ang 22-2 nga Echo team gipangulohan nilang Ronald Catong ug Nelson Solana sa ilang 30 ug 16 puntos matag usa.

Puntos matag usa

Unang duwa:

DELTA (87) - Gutierez 45, Villarosa 22, Estrada 6, Sinag 4, Sameon 4, Ho 2, Gonzaga 2, Genon 2

BRAVO (76) - Maspiñas 20, Tenchavez 15, F. Desoyo 13, Perino 10, Codilla 6, Arnaiz 4, Arnibal 4, Aves 4

Ikaduhang duwa:

GOLF (77) - Arellano 31, Craso 14, Garcia 13, Barellano 11, Delos Reyes 4, Superales 2, Redera 2

 ECHO (66)- Catong 30, Solana 16, Ji. Villarosa 8, Dianon 6, Aspera 4, Desoyo 2

(BANAT NEWS)