CEBU, Philippines - Mibalik sa finals ang defending champion Super Idols ni playing coach Bong Pepito human ilang gidispatsar ang Bhutakalz sa iskor 63-55 kaniadtong Sabado atol sa nagpadayong Integrated Bar of the Philippines (IBP) 9th Season 2012 basketball tournament didto sa Capitol Parish gym sa dan Escario, ning dakbayan.
Ang Super Idols kinsa nagduwa nga wala ang napiang nga kauban nga si Erwin Heyrosa, makigtakos batok sa Pañeros Dynasty alang sa knockout finals karong umaabot Biyernes . Nakuha sa Pañeros ang unang luna sa finals human ilang gipalagpot ang Pecandela Law Firm, 53-49.
Naglabaw og nuybe puntos ang Super Idols, 25-16 sa first period ug padayong naglabaw hangtod na sa fourth period pinaagi sa mga puntos nilang Ramsey Quijano ug Fermin Pepito aron maka-ipsot ngadto sa otso puntos nga kadaugan.
Si Pepito maoy nangu sa Super Idols sa iyang 16 puntos samtang nagkumboya silang Quijano ug Benjo Macion ug 23 puntos.
Ang Bhutakalz gipangulohan nilang Van Ligutan ug Boyet Velez kinsa miposa og 13 puntos matag usa ug si Rey Gealon midugang ug 12 puntos.
Sa laing knockout match, krusyal nga three-pointer gikan ni Michael Molde sa nahibiling 33 segundos maoy nagtabla sa duwa sa iskor 48-all unya gisundan sab dayon sa undergoal stab ni Roldan Mendoza may 13 segundos ang oras aron mailog ang labaw, 50-48 ug ang duha ka free throws ni Ruel Juban ug Barry Busi maoy nagselyado sa kadaugan.
Si Juban maoy nangu sa Pañeros sa iyang 23 puntos samtang si Busi miamot og 10 puntos.
Silang Tommy Yu ug Mark Russ Gamallo maoy nangu sa Pecandela-Primary Homes sa ilang 12 ug 10 puntos, matag usa.
Puntos matag usa:
First Game:
IDOLS (63)- F. Pepito 16, R. Quijano 13, Macion 10, Sumampong 8, Piquero 4, Arrabis 4,
B. Pepito 4, Ibones 2, Salubre 2.
BHUTAKALZ (55)- Ligutan 13, Velez 13, Gealon 12, Guieb 7, Arnaiz 4, Ang 2, Villarin 2, Remedio 1, Verallo 1.
Second Game:
PAÑEROS (53)- Juban 23, Busi 10, Molde 9, Mendoza 6, Cabilte 3, Ordeniza 2.
PECANDELA (49)- Yu 12, MR Gamallo 10, Capoy 8, Fr. Pepito 7, I. Gamallo 5, Malazarte 4, Tenefrancia 2, Musong 1. (GGM)(BANAT NEWS)