Memphis gidagit sa Hawks

CEBU, Philippines - Paspas ug kusog nga matang sa duwa dugang pa gyud niini ang hugot nga depensa ug mga three-pointers ni Lou Williams ang gigamit sa Atlanta Hawks sa third period aron  molampos pagpukan sa Memphis Grizzlies sa iskor, 93-83 kagahapon sa nagpadayong duwa sa NBA didto sa FedEx Forum sa Memphis, Tennessee.

Tungod sa maong kapildehan, mikanaug sa ikatulong pwesto ang Memphis sa Western Conference sunod sa San Antonio Spurs ug sa Oklahoma City Thunder.

“I think we were just trying to play it safe because (the Grizzlies) are a really good team,” matod pa sa Atlanta guard nga si Jeff Teague. Midugang siya sa pag-ingon “They were playing at home, so we didn’t want to make any false moves and just keep it close. We just came in, (at halftime) and it was like: 'Forget it. Let’s play Hawks basketball and get after it.’ And it helped.”

Si Josh Smith maoy nangu sa Hawks sa iyang 24 puntos ug si Williams mi-iskor og 18 sa iyang 21 puntos sa second half. Midugang pa gyud si Al Horford og 19 puntos uban sa iyang 14 ka rebounds.

Si Teague igo lang miamot og 13 puntos uban sa iyang unom ka assists.

Ang leadership nilang Horford ug  Teague didto sa third period maoy nahimong yawe sa kadaugan tungod kay ilang na-outscore ang Memphis,  32-13. Sikit unta kaayo ang duwa hangtod sa tunga-tungang bahin sa third period dihang gipapas sa Atlanta ang ilang singko puntos nga biya human sila mosukli og sagunson 20 puntos aron maoy magkontrolar sa duwa ug wala na makagukod ang Memphis.

“(Teague) came in at halftime, and you could tell he was bothered by the way the first half went. He made an effort to play better and pick up the pace of the game. I think that was the difference,” matod pa ni Horford. (GGM gikan sa NBA.com)

Silang Zach Randolph ug Marc Gasol parehong mihimo'g 18 puntos aron pangulohan ang Memphis ug may 13 ka rebounds si Randolph. Mao lang kadto'y ikaduhang pillde sa Memphis sa ilang homecourt karon nga season. Si Rudy Gay mibahug ug 17 puntos apan igo lang mihimo'g 7 of 25 gikan sa field ug si Mike Conley midugang ug  12 puntos.

Ang Atlanta labaw sa rebound, 44-40 ug ila sab na-outscore ang Grizzlies sa ilawom, 42-38. (GGM gikan sa NBA.com)(BANAT NEWS)