Walay atrasay -- Gesta

CEBU, Philippines -  Sukmagay nga walay daganay maoy gusto ni  Cebuano lightweight contender Mercito 'No Mercy' Gesta (26-0, 14KOs) sa iyang pakigsangka ni Mexican champion Miguel Vasquez (32-2, 13KOs) karong Domingo didto sa MGM Grand Garden  Arena sa Las Vegas, Nevada.

Ang garbo sa Brgy. Labogon, Mandaue City nga si Gesta mosuway pagsakmit sa IBF lightweight title nga gikuptan karon ni Vasquez sa undercard sa  ikaupat nga panagsangka  nilang Manny Pacquiao ug Juan Manuel Marquez.

Ang amahan ug trainer ni Gesta nga si Anecito miingon nga nagpanikad na ang iyang anak sa maong away ug aduna na sila'y gameplan aron pagsumpo ni Vasquez.

Matud pa ni Anecito nga paningkamotan nila nga ma-presyur si Vasquez pinaagi sa bangis nga atake sa iyang anak aron may purohan kining mohimo'g knockout nga kadaugan.

"Ang amo kay ma-presyur si Vasquez ug makig-bell-to-bell, mas kusog og kumo si Mercito mao nang mag-expect mi nga magsige og dagan si Vasquez," matud pa ni Anecito dinhi sa  Banat News.

Nagpasalamat ang mag-amahang Gesta sa padayong suporta sa ilang mga Filipino boxing fans ug nangayu usab sila'g  dugang suporta ug pag-ampo aron molampos ang Sugbuanong boksidor sa pagsakmit sa world title. (BANAT PALARO)