Azkals sa knockout stage
Naglayat-layat ang mga football maniacs sa Pilipinas tungod sa pagdaog sa Philippine Azkals batok sa Myanmar niadtong Biyernes sa gabii, 2-0. Ang kadaugan maoy nagselyo sa mga Pinoy aron makasulod sa knockout stage.
Makauban sa Azkals sa knockout stage ang 2012 Suzuki Cup host Thailand ug sa mahibiling top two teams sa Group B. Posibleng ang Indonesia ikasangka sa sunod duwa sa Azkals sa Disyembre 8 ug 12 dinhi sa Pilipinas sa Rizal Stadium. Kini kun dili mausab ang kasamtangang standing sa Group B.
Maayo unta'g dunay susama niini ka prestihiyosong torneyo nga himuon sa Cebu City Sports Center sama sa friendly game tali sa Singapore Lions ug Azkals sa miaging buwan.
Sa Group-A standing, ang Azkals nabutang sa ikaduhang puwesto sa ilang sayes puntos, sunod sa Thailand nga adunay nuybe puntos. Sunod ang Vietnam ug Myanmar nga adunay tag-usa ug nataktak na sa torneyo.
Salamat sa puntos ni Phil Younghusband sa ika-47 minutos ug Angel Guirado sa ika-93 minutos. Ang pagdaog sa Azkals ug pag-abante sa semifinal round pagpamatuod lang nga dili tsamba ang pagpildi nato sa Vietnam, 2-0 sa ila mismong tugkaran atol sa 2010 Suzuki Cup.
Dili kabayran ang gihimo ni Ed Sacapano pagdepensa sa atong goal gikan sa mga atake sa Myanmar labi na gikan ni Kyi Lin nga pwerteng agresiboha sa kinatibuk-ang duwa.
Ipanghinaot lang nato nga makalingkawas sa knockout stages ang Azkals aron mahatagan kini'g higayon nga makasud sa finals.
Ang pagdaog nato sa Myanmar maoy nagputol sa ilang dominasyon sa mga Pinoy. Bisan kausa wala pa kita makadaog sa Myanmar ug niadtong Biyernes pa kini nahitabo didto sa Supachalasai Stadium sa Bangkok, Thailand.
* * *
Sa samang adlaw sa duwa sa Azkals mao usab ang pagsaka sa ring sa atong fighting congressman nga si Manny 'Pacman' Pacquiao kontra ni Juan Manuel 'Dinamita' Marquez sa ilang ikaupat nga panag-abot.
Ang Disyembre 8 sa Estados Unidos gabii sa ilaha, apan Domingo dinhi sa ato (Disyembre 9). Meaning? Malingaw ang atong weekend sa sunod semana..
PAGTULON-AN: "Ang tawong kalit kadatu, paspas ang pagtibugsok." - Archbishop Emeritus Ricardo Cardinal Vidal
PAHIBALO: Giawhag ang tanang mga sakop sa Alpha Sigma Omega International Service Fraternity (SIOUX) sa pagdonar og dili momenus usa ka dosenang tsinelas (edad 6-12 anyos) alang sa tinuig nga "Tsinelas ni Dodong ug Inday" project. Ihatag kini ngadto sa mga opisyales sa National Board, Provincial ug City sa dili pa ang Disyembre 5.
- Latest
