3rd Cebu City Marathon gitakda sa Enero 13

CEBU, Philippines - Pormal na nga gilusad kagahapon didto sa buhatan ni Mayor Mike Rama ang 3rd Cebu City Marathon, ang labing dakung running event sa Sugbu nga gikatakda sa Enero 13, 2013 didto sa Cebu Asiatown IT Park.

Atol sa launching, si Mayor Rama mihatag sa iyang siyento porsiyento nga suporta ngadto sa Cebu City Marathon nga giisip usab nga labing bonggang marathon sa nasud.

Gawas sa kahapsay sa trapik ug seguridad sa mga runners, ang kagamhanan sa siyudad Sugbu mipasalig usab nga motabang sa premyo nga ihatag sa mga mananaog.

Sama sa gihapon, gawas sa 42 full marathon, laing kategoriya nga mahimong pilian nga daganan naglakip sa 21K half marathon ug 5K marathon.

Ang registration fee nagkantidad og P1,400 sa 42K, P900 sa 21K ug P600 sa 5K alang niadtong sayong magparehistro kutob karong buwana, samtang ang ulahing magparehistro hangtod sa Disyembre 16 mobayad na og P1,800 sa 42K, P1,200 sa 21K ug P800 sa 5K.

Gawas sa kahigayonan nga makadagan, apil na sa registration fee ang usa ka limited edition New Balance singlet, specially-designed medal sa 42K finishers, timing chip, snacks ug raffle tickets human sa lumba.

Mahimong magparehistro didto sa Active Zone sa Ayala Center-Cebu o pinaagi sa online registration sa www.cebumarathon.com. (BANAT NEWS)