Congrats, Azkals
Sa dili pa ang tanan, atong pahasubo sa banay sa atong kauban sa Cebu media nga si Marlon Bellita, kinsa mitaliwan na sa laing kalibotan human sa duha ka semanang pakigbisog sa iyang sakit.
Kanimo Sir Marlon, maayong pagpanaw ug pahuway sa dayon. Mopasalamat usab kita sa mga nanambong sa Concert for a Cause nga gihimo diha sa Cebu City Police Office alang ni Marlon ug sa mga sakop sa media nga nasakit.
Wala ako makatambong sa kalihukan gumikan sa mga kakulian dinhi sa trabaho. Apan ang akong kasingkasing naa sa katuyoan sa maong kalihukan.
* * *
Niadtong Huwebes nasaksihan gyud nako kun unsa ka grabe na ang pagdawat sa mga Sugbuanon sa duwa nga football. Nakaingon nga duna gyud diay ‘sleeping followers’ ang duwa nga football dinhi sa ato. Nagkinahanglan lang gyud diay og gamay nga pagpamukaw sama sa gihimo sa Philippine Azkals nga mihimo og kasikas sa international arena gikan sa AFC Cup ngadto sa Suzuki Cup sa nanglabay’ng tulo ka tuig.
Tiaw mo nang diha sa gawas pa lang sa Cebu City Sports Center nagdasok na ang mga tawo bisan tunga-tunga na ang duwa.
Kun tan-awon, puwerteng mahala gyud sa mga tiket, apan wala kini panumbalinga sa mga nagpakahilom nga football fans ug niadtong bag-o pang na-convert into a fan of the sport. Courtesy of Azkals.
Nagkita mi sa usa nato ka kauban dinhi sa Banat News/The Freeman nga si Roel nagpaabot gyud nga makasulod bisan bug-at ang presyo, aw panagsa ra man ni.
* * *
Samtang nagmaya kita dinhi sa ato sa kadaugan sa Azkals batok sa Singapore Lions, 1-0, akong gisubay ang mga web forums sa Singapore aron ato sab mabati ang ilang gibati sa kapildihan sa ilang team.
Sus, nakaingon gyud ko nga bentaha na lang gyud og diyutay ang mga Pinoy itandi sa mga Singaporeans kun manaway.
Grabehang nakasaway sa mga Singaporeans sa ilang team, sa coach. Gibasol pa nila ang ilang gobiyerno tungod sa mga sunod-sunod nga kapildihan sa ilang gipasigarbong Singapore Lions.
Dunay miingon nga walay ayo ilang nakuhang coach, ilaha usab gisaway ang pagpanguha og foreigners ug bisan na gani ang kalidad sa ilang training. Duna pay misugyot nga mas maayo pang mobalik sa "basics" ang ilang team.
* * *
Atol sa maong duwa, daku'g papel ang Philippine Army keeper nga si Ed Sacapaño tungod sa maayo niyang pagpanalipod sa goal gikan sa mga ataki sa Singapore.
Gani, sumala pa sa mga reports mas daghan og attempts ang mga Singaporeans itandi sa mga Pinoys apan ang maayong pagbantay ni Sacapaño maoy deperensiya.
Seguro kun lain pay nagbantay, basin napilde pa ang Azkals. So magpasalamat kita kang Sacapaño. Mga Tirador, Pakpak!
Pakpakan usab nato ang nag-inusarang scorer nga si Marwin Angeles nga usa sa mga substitutes sa Azkals. Ang iskor ni Angeles nahimo tungod sa maayong plastada sa bola gikan ni Phil Younghusband. Pakpakan usab nato si coach Hans Michael Weiss sa kalampusan ug labaw sa tanan ang mga Cebuano fans!
Ang Azkals gikatakdang moduwa sa Thailand karong Nobiyembre 24 alang sa Suzuki Cup 2012. Naapil ang Azkals sa Group A nga gilangkuban sa mga bug-at nga teams dinhi sa Southeast Asia nga mao ang Vietnam, Thailand ug Myanmar.
Diha sa Suzuki Cup nagsugod ang paglawig sa Azkals dihang gipakuratan niini ang kalibotan sa football pinaagi sa pagpilde sa host Vietnam niadtong 2010.
Mao na ni ang ikaduhang higayon nga gipilde sa Azkals ang Lions. Sa unang friendly match nila didto sa Singapore, gipildi sa Azkals ang Lions, 2-0 duha na ka bulan ang nakalabay.
* * *
PAGTULON-AN: Walay pulos ang lider kun dili ka makamaong mokurehir ug molantaw sa kalidad sa ilang gibuhat.
* * *
PAHIBALO: Giawhag ang tanang mga sakop sa Alpha Sigma Omega International Service Fraternity (SIOUX) sa pagdonar og dili momenus usa ka dosenang tsinelas (edad 6-12 anyos) alang sa tinuig nga "Tsinelas ni Dodong ug Inday" project. Ihatag kini ngadto sa mga opisyales sa National Board, Provincial ug City sa dili pa ang Disyembre 5. Ikatulong tuig na kining proyektoha sa maong fraternity
- Latest
