Phl Azkals motambong sa Aboitiz footballfest

CEBU, Philippines - Motambong ang Philippine Azkals sa pagsikad sa 15th Aboitiz Cup football tournament karong ala-1 sa  hapon diha sa Aboitiz Sports Field sa barangay Subangdaku sa dakbayan sa Mandaue.

Gawas sa garbo sa Sugbu nga si Paolo Pascual, laing Azkals nga motambong sa kalihukan mao ang managsuong Younghusband nga sila si Phil ug James uban nilang Marvin Janwer Ageles, Ian Araneta, Chiffy Caligdong, Joshua Beloya, Jason Sabio, Jeffrey Christiaens, Jason Nicolas De Jong, Andres Gonzales, Christopher  Robert Greatwich, Roel Gener, Misagh Bahadoran, Carlos Martinez de Murga, Eduard Sacapano, Denis Wolf, Patrick Reichelt, Matthew Christopher Uy, Demitrius Omphroy, Juan Luis Guirado ug Mario Rafael Garcia.

Ang team manager nga si Dan Palami ug coach Hans Michael Weizz gilauman usab nga motambong sa maong kalihukan nga gipasiugdahan sa Cebu Football Association (CFA) nga gipangulohan sa ilang presidente Ricky Dakay.

Ang CFA nangandam alang sa usa ka makasaysayanon nga kalihukan diin mo-host kini sa labing unang international football friendly game dinhi sa  Sugbu tali sa Philippine Azkals ug   Singapore Lions karong Huwebes diha sa Cebu City Sports Center (CCSC).

Ang duwa gikatakdang sugdan sa alas-7 sa gabii.

Ang friendly game magsilbeng final tune-up sa Azkals sa dili pa kini mosalmot sa AFF Suzuki Cup sa Nobiyembre 24 didto sa Thailand.

Matud pa ni tournament director Glenn Quisibo, nga ang CFA mohatag og 150 ka mga tiket sa "Azkals vs. Lions: Face Off" ngadto sa mga mananaog sa fun games karong adlawa.

Mga side events nga tigian mao ang juggling, longest boot, slalom race, x-mark the spot or accuracy contest, longest throw-in/target, longest goal ug head-to-head volleyball. (BANAT  SPORTS)