Dapudong biktima sa tikas?
CEBU, Philippines - Miangal karon ang kampo ni Filipino boxer Edrin Dapudong nga biktima sila sa usa ka ‘hometown’ decision human napilde sila pinaagi sa split decision batok sa South African nga si Gideon Buthelezi kagahapon didto sa Emperor Palace Hotel Casino sa South Africa.
Kahigayunan na unta kadto ni Dapudong nga makuha ang IBO junior bantamweight belt, apan daw nagkunsabo ang mga hurado sa South African sa daog.
Tataw kaayo nga si Dapudong ang midominar sa maong away tungod kay gawas nga napatumba niya sa makausa ka higayun ang kontra, naputos usab ang nawung ni Buthelezi human sa dose ka hugna sa away.
Sa taho sa Philboxing.com, mismo ang mga South African boxing media ang nagtuo nga si Dapudong ang midaog, apan apil sila nga nahibung dihang si Buthelezi ang gideklarar nga mananaug.
Nasayran nga sa wala pa ang away, ang manager ug trainer ni Dapudong nga si Aljoe Jaro mipahimangno na ni Dapudong nga kinahanglan niya nga ma-knockout ang iyang kontra aron malikayan ang hometown decision.
Ang South Africa usa ka nasud nga notado na sa mga tikas sa desisyon ug pipila na usab ka mga Pinoy boxer ang nabiktima niini. (BANAT NEWS)
- Latest
