CEBU, Philippines - Mikulit sa ilang ikatulong daog ang UC-PICPA quintet ni Edward Bauzon human ilang gilatos ang Bombardier Zefiro sa iskor, 62-48 samtang midaug sab ang Hoopers batok sa R.P. Lycans ni Atty. Reiner Mora, 50-41 kaniadtong Domingo atol sa nagpadayong elimination round sa Philippine Institute of Certified Public Accountants (PICPA) 2012 basketball tournament didto sa UV-Gullas gym sa dan Colon, ning dakbayan.
Ang UC-PICPA nagbaton na karon og 3-1 nga baraha samtang mao sab kadto'y ikatulong daog sa Hoopers ni Yoly Meso kinsa naghupot og 3-2 nga baraha.
Igo lang naglabaw ug kuatro puntos ang Hoopers sa halftime, 16-12 sa usa ka low-scoring ballgame ug naglabaw na lang og dos puntos pagsugod sa fourth period, 32-30.
Hinoon, kalit nga nahigmata ang Hoopers didto sa fourth period diin na-outscore nila ang Lycans, 18-11 dihang mi-epekto ang half-court trapping defense ni coach Norwin Honoridez.
Si Dondon Santiago maoy nangu sa Hoopers sa iyang 15 puntos samtang si Lito Ortiz midugang og 10 puntos.
Silang Ian Boy Cadampog og Benedict Bandala maoy nagdala sa opensa sa napildeng Lycans human sila moposa og 12 ug 11 puntos, matag usa.
Sa laing bahin, gidominar sa UC-PICPA ang kinatibuk-ang duwa diin mibahug og 20 puntos si Jecon Bonsucan aron pangulohan ang iyang team.
Ang Bombardier Zefiro gipangulohan nilang Adonis Estrella ug Walter Ducay kinsa mihimo sab og 12 ug 11 puntos, matag usa.
Puntos matag usa:
First Game:
Hoopers (50)--- Santiago 15, Ortiz 10, Torres 9, Ju. Makinano 4, Meso 4, Al. Yu 3, F. Yu 3, Je. Makinano 2.
LYCANS (41)- Cadampog 12, Bandala 11, Padios 8, Destriza 4, Huyo-a 4, Mora 2.
Second Game:
UC-PICPA (62)- J. Bonsucan 20, Bauzon 10, Rengue 9, Tizon 7, Sabala 6, Balucan 4, Cabuguas 4, Seno 2.
ZEFIRO (48)- Estrella 12, Ducay 11, Navaja 7, Vallespin 7, Judaya 5 (GGM)
Pacquiao nabalda sa training
Wa kapugngi ni Wild Card Gym head trainer Freddie Roach nga ipadayag ang iyang kasuko human mahibalo nga nadisturbo na usab ang training sa iyang ‘prized fighter’ nga si Manny Pacquiao.
Ang Hall-of-Famer trainer giingong nadismaya human madunggi nga napalta si Pacquiao sa iyang inadlaw nga jogging tungod kay dugay kini nakatug tungod sa pagbinuntagay niini sa bible study uban sa iyang mga kauban sa religious group didto sa iyang apartment sa Los Angeles.
“Roach had to restrain his anger and disappointment upon hearing news that Pacquiao missed his routine morning run after being kept up late by a new church group that visited him in his LA apartment,” taho pa sa Examiner.com.
Nasayran nga si Roach una nang namahayag nga gusto siya nga mohatag sa tibuok niyang atensyon si Pacquiao sa training aron maseguro nila ang usa ka impresibong kadaugan batok ni Mexican Juan Manuel Marquez sa Disyembre 8 didto sa MGM Arena sa Las Vegas.
Sa iyang bahin, si Marquez gikataho usab karon nga grabe sa iyang ensayo ug mas midako ang lawas niini isip pagpangandam sa iyang saad nga tumbahan ang eight-division world champion.
Sa katapusan nilang sangka niadtong miaging tuig, si Marquez nagpadako usab sa iyang lawas ug napamatud-an kini nga epektibo tungod sa nabatunan niyang kusug ug kalig-on batok sa iyang karibal nga si Pacquiao. (BANAT NEWS)