Tnt express Midemolis sa Northwind, alos catering ug Global daog Sab
CEBU, Philippines - Gidemolis sa TNT Express ang Northwind Hotel pinaagi sa pag-iskor og 61-42 nga kadaugan samtang midaug sab ang Bibo batok sa Fingerboard sa iskor, 77-68 niadtong Domingo sa nagpadayong duwa sa Sta. Catalina Inter-Commercial ug Inter-Company basketball tournament didto sa sitio Avocado sa barangay Lahug, ning dakbayan.
Kaniadtong Lunes, nagpadayon ang maong torneyo diin midaug sab ang Alos Catering batok sa Sun Riser sa iskor 94-89 ug sa laing duwa naka-ipsot ang Global Carrier batok sa Globe Cellpod, 67-60.
Gipangulohan ni Jake Mimoza ang TNT Express human siya mopusa og 22 puntos samtang si Dodong Elizalde miamot og 12 puntos.
Sa laing bahin, mibahug og 26 puntos si Renante Dionson aron maoy motimon sa Bibo samtang laing tulo ka teammates ang mibahug sab og double figures.
Silang Eddie Sanchez ug Albert Villacillo maoy nangu sa Fingerboard sa ilang 18 ug 12 puntos matag usa.
Sa duwa niadtong Lunes, tulo ka players sa Alos Catering ang misakmit og kapin 20 puntos aron pabugnawon ang Sun Riser diin mihimo'g 28 puntos si Clark Monsanto og parehong mibahug og 23 puntos silang Fritz Dajalos ug Daniel Ramos.
Nasuhong ang masipang 45 puntos ni Jaymar Edlen kinsa maoy nangu sa Sun Riser. Silang Joy Alinton ug Elvis Alabarillo midugang og 18 ug 14 puntos, matag usa alang sa Sun Riser.
Ang Global Carrier kinsa naglisod tungod kay wala ang ilang duha ka big men nga si Gleran Gelbolingo ug Neil Kintanar, gipangulohan ni Jimboy Alcover kinsa mipunting og 20 puntos.
Ang napildeng Globe Cellpod gipangulohan ni Darwin Dinopol kinsa misakmit og 22 puntos. (BANAT NEWS)
- Latest
