BIR naka-eskapo kontra sa CTU

CEBU, Philippines -  Gipakuratan sa Bureau of Internal Revenue (BIR)-Cebu nga gipangulohan sa ilang captain ball Yoly Meso dihang mi-iskor sila'g 64-60 nga kadaugan batok sa mas batan-ong Cebu Technological University (CTU) kaniadtong Lunes sa gabii atol sa nagpadayong   Association of Regional Executives in National Agencies (ARENA), Region 7 basketball tournament didto sa DPWH covered court sa South Road Properties (SRP),dakbayan sa Sugbo.

Naglabaw ang BIR sa opening period, 17-14 ug silang Leo Galvez ug Allen Sorela maoy namuntos niadtong higayona.

Nanginit ang CTU didto sa second period dihang misukli sila'g 16-11 run aron mailog ang labaw sa halftime, 30-28 diin mipakita'g katakos silang Melvin Abarquez ug Cesar Pacolor kinsa mi-iskor og mga fastbreak points.

Nahimong sikit ang duwa sa kinatibuk-ang third period dihang nagtabla ang duha ka kampo sa iskor, 44-all.

Hinoon, nakabawi og diotay ang BIR ni coach Norwin Honoridez dihang ilang gipahugtan ang ilang depensa hinungdan nakahimo'g daghang turnovers ang CTU.

Si Meso maoy nagtimon sa 20-16 scoring run sa BIR kinsa naghupot na karon og 1-1 nga baraha samtang ang CTU mitidlum ngadto sa 0-3 nga baraha.

Silang Sorela ug Leo Galvez maoy nangu sa BIR sa ilang 13 puntos matag usa samtang silang Gerry Densing ug Melvin Abarquez maoy nangu sa CTU sa ilang 12 ug 11 puntos matag usa ug parehong miamot og 10 puntos matag usa silang Joshua Rosell ug Cesar Pacolor.

Puntos matag usa:

 BIR (64)- Sorela 13, Galvez 13, Meso 7, Cavan 6, Baclayon 6, Limbaroc 4,

Diamos 4, Del Rosario 4, Dizon 2, Pajares 2, California 2, Billones 1.

CTU (60)- Densing 12, Abarquez 11, Pacolor 10, Rosell 10, Genobiagon 6, Taperla 5, Sin 4, Paulo 2 (BANAT NEWS)