Unang PPV fight ni Donaire giplano
CEBU, Philippines - Gipaabot karon kun himuon ba nga usa ka pay-per-view fight ang gikahinamang ‘blockbuster’ fight tali nila ni four-division world champion Nonito 'The Filipino Flash' Donaire batok ni Jorge ‘Travieso’ Arce sa Disyembre 15 didto sa Toyota Center sa Houston, Texas.
Kun himuong pay-per-view, kini unya ang opisyal nga PPV debut ni Donaire kinsa usa karon sa mga sikat nga boksidor sa iyang henerasyon.
Human sa malampuson niyang pakigsangka ni kanhi Japanese champion Toshiaki Nishioka kinsa iyang gipaundang sa round 9, ang Fil-American boxing superstar nga si Donaire manalipod sa iyang WBO superbantamweight title batok sa veteran Mexican knockout artist.
Daku og puruhan nga mahimong PPV fight ang maong sangka tungod usab kay mabuhi na usab niini ang dugay nang panagribal sa Pilipinas ug Mexico. Si Donaire gihulagway nga ikaduhang labing sikat nga boksidor sunod ni Manny Pacquiao, samtang si Arce nagbaton usab og bagang fan base gikan sa mga Mexican boxing fans.
“Donaire is ripe to headline a PPV fight of his own because he has already attracted substantial attendance numbers in his most recent fights,” matud pa sa boxing analyst nga si Leo Reyes.
Ang 29-anyos nga si Donaire adunay rekord nga 30-1, 19KOs, samtang si Arce kinsa mas tiguwang og unom ka tuig nagtangag og rekord nga 61-6, 31KOs.
(LPM)(BANAT NEWS)
- Latest
