Heat wa kapugngi
CEBU, Philippines - Gisubhan dayon sa Miami Heat ang 2012-2013 NBA season og impresibong kadaugan human nila gilubong ang higpit nga karibal sa East ang Boston Celtics sa iskor, 120-107 kagahapon sa opening game didto sa American Airlines Arena sa Miami, Florida.
Mibahug og 29 puntos si Dwynae Wade ug midugang si LeBron James og 26 puntos ug 10 ka rebounds bisan pa og daghan siya'g sipyat sa second half.
Miamot og 10 puntos si Rashard Lewis alang sa Miami kansang labaw nga 19 puntos mikunhod sa kataposang kuwatro minutos sa duwa apan na-inat ra gihapon pag-usab aron modaug og 13 puntos.
Miposa og 23 puntos si Paul Pierce alang sa Boston ug midugang si Rajon Rondo og 20 puntos uban sa iyang 13 ka assists ug midugang pa gyud si Leandro Barbosa og 16 puntos. Ang Celtics kinsa miyukbo sa Heat sa miaging Eastern Conference finals, wala mopakita sulod sa korte atol sa ring ceremony.
Mihimo'g 11-2 run ang Boston sa uwahing bahin sa fourth quarter aron mosikit, 111-107 human sa lay-up ni Courtney Lee may 2:09 ang nahibilin sa duwa apan mao kadto'y kataposang utong sa Celtics.
Gidawat sa Heat ang ilang mga championship rings gikan sa team owner nga si Micky Arison ug mitan-aw pag-isa sa banner nga ilang nakuha sa miaging season dungan sa usa ka indoor nga fireworks show.
Dugang fireworks ang mitumaw human tawagi og flagrant foul si Rondo ngadto kang Wade may 16.9 segunos ang nahibiling oras. Ang pagbiya ni Ray Allen maoy nakadugang sa kayugot.
Sa pagsulod ni Allen sa korte sa labing unang panahon nga nagsul-ob sa Heat nga uniporme, miduol siya ngadto kang Celtics' coach Doc Rivers kinsa wala motago sa iyang kahimangud pagtapon sa iya kanhing shooting guard ngadto sa Miami.
Milamano dayon si coach Rivers sa mga assistant coaches ug sa ubang players apan dihang miduol siya ni Kevin Garnett, wala kini motimbaya kaniya apan wala sab kini igsapayan ni Allen kinsang unang puntos sa Heat naggikan sa three-pointer diin mitapos siya'g 19 puntos. (BANAT NEWS)
- Latest
