CEBU, Philippines - Temporaryo karong nag-una sa liderato ang Allyn & Sons sa Power Forty Christmas League basketball tournament human miposte og daog batok sa Park N' Go Bakeshop, 109-106 alang sa ilang 2-0 nga baraha niadtong Martes didto sa Inayawan Sports Complex.
Sa sayo pa, ang UTASSCO Utility miyabo sa Water Market sa iskor nga 105-96 sa una nilang duwa.
Tulo ka players sa Allyn & Sons ang grabeng nagmangtas diin pulos kini miiskor og kapin 20 puntos. Gipangulohan kini ni Dodong Piezas, kinsa mipakatap og 28 puntos, si Julian Capala midugang og 24 puntos ug si Carding Vernaiz miamot og 23 puntos.
Nag-igo sab silang Tata Pestaño ug CESAFI referee Melvin Caumeran kinsa mikulit og 16 ug 14 puntos matag usa.
Si Glen Rama, usa sa mga sakop sa Rama clan mipabuto og 22 puntos, samtang si Adot Tabar miamot og 20 puntos.
Nakaamot sab og daku silang Jingjing Rama, Gogo Fuentes, Al Misa ug Mark Lisondra, apan wala gihapon kini makaluwas sa ilang koponan.
Sa laing bahin, si Teddy Ebrado mibahog og 25 puntos, samtang si Alex Mercado miburak og 22 puntos alang sa Utassco Utility ni team owner Atty. Flor Yosores. Si Michael Veloso midugang og 16 puntos ug Wilbur Cabrera miabuno og 15 puntos.
Ang napildeng Water Market gipangulohan ni Caloy Lim, kinsa mihipos og 20 puntos. Silang Jun Nacional ug Efren Mosqueda mitikdol og 14 puntos matag usa, gisundan ni Michael Arias mitikdol og 13 puntos ug si Mark Libre mitunol og 12 puntos.
PUNTOS MATAG USA
Unang duwa:
UTASSCO (105) - Ebrado 25, Mercado 22, Veloso 16, Cabrera 15, Abarquez 9, Yosores 8, Abasolo 8, Echavez 2
Water Market (96) - Lim 20, Nacional 14, Mosqueda 14, Arias 13, Libre 12, Ozon 8, Ungria 7, Eleguin 6, Navares 2
Ikaduhang duwa:
Allyn & Sons (109) - Piezas 28, Capala 24, Vernaiz 23, Caumeran 14, Javierto 2, Lawas 2
Park ‘N Go (106) - G. Rama 22, Tabar 20, J. Rama 18, Fuentes 17, Misa 15, Lisondra 10, Espinosa 4 (BANAT SPORTS)