Landmasters kampiyon sa shaabaa

CEBU, Philippines - Giharos sa Cebu Landmasters ang ilang best-of-three title showdown human nila gidemolis ang Goldberry Suites, 59-45 sa Game-2 aron langkaton ang korona sa 17th Sacred Heart-Ateneo Basketball Athletic Association (SHAABAA) niadtong Domingo didto sa SHS-Ateneo gym sa Canduman Campus, Mandaue City.

Ang Landmasters nga mikulit og 66-61 nga kadaugan sa Game 1, mipakita sa ilang dili hitupngan nga teamwork. Mikugi sab sila sa    sulod ug gawas sa korte nga maoy nahimong yawi sa paglangkat sa korona.

Igo lang naglabaw og usa ka palito ang Landmasters human sa first quarter, 12-11.

Mipahigayon dayon og full-court press defense ang Landmasters sa second period ug nakahimo sila sa pagkontrolar sa duwa aron tapuson ang halftime sa iskor nga 29-21.

Sa wala damha, kalit lang nga miburot ang labaw sa Landmasters og 11 puntos   human sa third period, 39-28.

Nakasikit unta ang Goldberry sa fourth quarter, apan si Lery Chik kalit lang mipabuhagay og sagunson nga sayes puntos aron inaton pag-usab ang ilang labaw.

Ang three-pointer ni Gino Reyes maoy nakahugno sa kampanya sa Goldberry pagsakmit sa korona.

Balanse kaayo ang opensa sa Landmasters diin si Franco Ten mipugnit og 12 puntos aron pangulohan ang iyang team. 

Silang Raymund Mangubat ug Chik midugang og 10 puntos matag usa alang sa Landmasters.

Ang Goldberry gipangulohan ni Jeremy Huang, kinsa miburak og 19 puntos, si Dave Lim igo lang miamot og nuybe puntos.

Puntos Matag Usa

Cebu Landmasters (59) - Te 12, Lopena 11, Chik 10, Mangubat 10, Villmaor 8, Reyes 5, Oquias 3

Goldberry (45) - Je. Juang 19, Lim 9, Borromeo 6, Ting 5, Tan 4, Ramas 2 (BANAT NEWS)