Pecandela pabiling way pilde, 5-0 na

CEBU, Philippines - Pabiling walay pilde ang Pecandela Law Firm-Primary Homes ubos sa ilang captain ball nga si Mark Russ Gamallo human ilang gipatugdon ang Eagles quintet ni Atty. Kit Enriquez sa iskor, 81-64 kaniadtong Sabado aron pahugtan ang solong liderato sa nagpadayong elimination round sa 9th Integrated Bar of the Philippines (IBP)- 2012 basketball tournament didto sa Capitol Parish gym sa dan Escario, ning dakbayan.

Naglabaw og sayo ang Pecandela sa unang duha ka periods sa wala pa nila hingpit patugpaha ang Eagles aron modaug og 17 puntos.

Walay nakapiog kanilang Sam Malazarte ug Francis Pepito kinsa nagpatuyang og pamuntos aron pangulohan ang Pecandela sa ilang 20 ug 15 puntos, matag usa. Gawas pa niana, dako sab natabang silang Tommy Yu ug Ivans Gamallo kinsa nagkumboya og 21 puntos.

Ang Eagles kinsa midailos ngadto sa 1-4 nga baraha, gipangulohan sa tandem nilang Marven Miralles ug Al Lagahit human sila misakmit og 14 ug 13 puntos, matag usa.

Sa laing duwa, gipakuratan sa Bhutakalz nga kanhi gi-ila sa team nga Young Lawyers Association of Cebu (YLAC) ubos ni Cris Ang ang defending champion Super Idols ni Bong Pepito pinaagi sa pag-iskor og 73-69 nga kadaugan nga milanat una'g singko minutos nga overtime.

Ang Super Idols unta maoy naglabaw sulod sa unang tulo ka quarters pinaagi sa triumvirate nilang Fermin Pepito, Eugene Sumampong ug Benjo Macion kinsa maoy nangu sa opensa.

Hinoon, mipakita sa ilang katakos ang Bhutakalz ug mihimo kini'g mainitong rally, 31-17 nga gipasiugdahan nilang Van Ligutan, Cris Ang ug Ivans Verallo ug nahimong malamposon ang maong rally pinaagi sa pagtimon sa ilang maabtik nga point guard nga si Boyet Velez kinsang krusyal nga three-pointer maoy mitabla sa iskor ngadto sa 64-all human sa regulation period hinungdan sa overtime.

Gikontrolar sa Bhutakalz ang overtime period ug ilang gipugngan ang Super Idols ngadto lang sa singko puntos sulod sa singko minutos samtang nakabentaha sila'g gamay human sila makahipos ug nuybe puntos.

Sa sayo pa, midaug ang Dissenters pinaagi sa usa ka come-from-behind nga kadaugan batok sa Los Demonyos sa usa ka kulba-hinam nga sangka, 79-74.

Mipahigayon og 27-12 nga rally ang Los Demonyos didto sa third period aron molabaw og 17 puntos, 65-48 apan gihinay-hinayan kini'g kitkit sa Dissenters kinsa misukli ug makabungog nga 31-9 run aron papason ang ilang biya ug modaug og singko puntos.

Si Kern Sesante maoy nangu sa Dissenters sa iyang 23 points samtang si Lito Ortiz maoy nangu sa Demonyos sa iyang 14 puntos.

s

PECANDELA (81)- Malazarte 20, Fr. Pepito 15, Yu 11, I. Gamallo 10, Tomaodos 9, MR Gamallo 5, Avila 4, Godornes 3, Cañete 2, Enad 2. 

EAGLES (64)- Miralles 14, Lagahit 13, Hiyas 12, Santos 12, Canka 7, Solis 4, Puspos 2.

Second Game:

DISSENTERS (79)- Sesante 23, Sususco 12, Dela Cerna 11, Olingay 8, Ma. Sarno 8, Codera 7, Rosal 6, Garcia 2, Orcullo 2. 

DEMONYOS (74)- Ortiz 14, R. Bauzon 13, Pintor 13, E. Bauzon 8, Flores 7, Yap 6, Bragat 5, Ceniza 4, M. Velez 4.

Third Game:

BHUTAKALZ (73)- Ligutan 16, Ang 12, Verallo 11, B. Velez 10, Albeos 9, Arnaiz 7, Gealon 4, Remedio 2, Hupp 2. 

IDOLS (69)- F. Pepito 15, Sumampong 14, Macion 11, Apolinario 10, Ibones 8, Santiago 5, Piquero 4, Arrabis 2