Magtiwas

CEBU, Philippines - Game-5 karon. Wala na gyu’y panahon alang sa ugma ug ang modaog malipayong magsaulog sa ilang kalampusan, samtang ang mapilde maghandom na lang alang sa sunod season.

Mao kini ang tahas nga atubangon karon sa duha ka higanteng koponan dihang magtiwas ang nine-time champion University of the Visayas (UV) Green Lancers ug Southwestern University (SWU) Cobras alang sa collegiate crown    sa    12th Cebu Schools Athletic Foundation Inc. (CESAFI) basketball event diha sa Cebu Coliseum.

Ang UV-SWU series maoy labing sikit sa CESAFI finals tungod kay walay bisan usa kanila nga midaog og 10 puntos dili susama sa unang panahon nga grabe gyud ka dominante ang UV dihang diha pa nila si Joseph Ronald Quinahan ug kanhi coach Elmer 'Boy' Cabahug.

Walay nakabentaha niining maong duwa karong adlawa segun sa mga resulta sa serye diin ang pinakadakung winning margin sa Cobras singko puntos, 77-72 sa Game-1, samtang ang labing dakung winning margin sa Lancers kuwatro puntos, 69-65 sa Game- 3. Nasundan sa laing daog sa Cobras nga kuwatro puntos sa Game-4, 68-64 aron makapugos og rubbermatch ug napugngan ang Lancers paglangkat sa ika-10 nilang titulo.

Tungod sa kasikit sa series, ang duha ka koponan igo lang nakatigum og 15 total winning points   sa miaging upat ka duwa nga maoy rason nganong misamot kamabulokon ang ilang duwa.

Samtang tataw nga nagpakita ang Cobras og kasingkasing sulod sa finals, nagsalig sab ang Lancers sa ilang hataas nga championship experience nga maoy ilang bentaha karon.

Kinahanglan lang sa Lancers    nga ipakita   na   ni MVP Hernal 'Wowie' Escocio ang    iyang    katakus   ug mamawi sa iyang demalas sa free throws diin mipasulod lang siya'g usa sa 10 ka attempts sa Game-4.

Kinahanglan usab nga moabag si Steve Cedrick Akomo dili lang sa depensa kun di sa opensa. Si Akomo kanunay mapilde sa pinuntosay sa Cameroonians nga silang Benoit Mbala ug Justine Aboude.

Mosuporta sa opensa sa Lancers mao silang Jerome Silva, Phil Mercader, John Michael Abad ug Eman Calo.

Sa laing bahin, ang Cobras makasalig sab nilang Joseph Nalos, Bernie Bregondo, Bonifacio Guillena III ug Monbert Arong.  (BANAT SPORTS)