Game-5 ugma gyud

CEBU, Philippines - Ugma gyud duwaon ang gikahinamang Game-5 sa 12th Cebu Schools Athletic Foundation, Inc. (CESAFI) basketball tournament tali sa University of the Visayas (UV) Green Lancers ug Southwestern University (SWU) Cobras diha sa Cebu Coliseum.

Pormal kining gipahibalo ni CESAFI commissioner Felix O. Tiukinhoy Jr. atol sa press conference kagahapon sa buntag didto sa University of San Jose-Recoletos (USJ-R) Nursing amphitheater.

Nakab-ot ang maong desisyon bisan pa sa hugtanong pagsupak ni UV President ug First District Congressman Eduardo R. Gullas, kinsa wala mouyon nga i-uswag ang Game-5 nga orihinal gitakda kagahapon.

Nagkanayon si Tiukinhoy nga ang iskedyul nga gitumbok ni   Gullas mao ang high school finals sa UV Baby Lancers batok sa bag-ong kampiyon Sacred Heart School-Ateneo de Cebu (SHS-AdC) Magis Eagles.

Ang Magis Eagles miharos sa ilang "best-of-five" finals aron dagiton ang korona.

Adunay nakasuwat sa maong schedule nga "if necessary," apan wala kadto magpasabot nga iyaha kadto sa collegiate level.

Matud pa usab ni Tiukinhoy nga gusto unta nila nga himuon ang Game-5 karong adlawa, apan dili magamit ang Cebu Coliseum kay adunay mogamit.

Sa iyang mensahe ngadto kang Gullas pinaagi sa text, si Tiukinhoy nag-ingon nga ilang gisibog ang Game-5 ngadto sa Oktubre 6, apan dili kini sabton nga aduna siya’y gipaboran tungod kay bugtong ra niyang tumong ang kaayohan sa CESAFI ug dili pabor ngadto sa usa ka eskwelahan.

Nanghinaut si Tiukinhoy nga masabtan ni Gullas ang iyang pamahayag isip usa ka haligi sa sports ug tinuoray nga sportsman. Gipasabot na sab ni Tiukinhoy kalabot niining maong isyu ang CESAFI president nga si Fr. Peter Silab, OAR ug si Samsam Gullas, ang athletic director sa UV.  (BANAT NEWS)