Matapos ibulsa ang unang International title, Peace Cup team isasabak sa malalaking torneo
MANILA, Philippines - Nasa isipan ng Philippine Football Federation na isabak ang line-up na nanalo sa Peace Cup sa iba pang malalaking football events na lalahukan ng bansa.
Ayon kay PFF president Mariano Araneta na naging panauhin sa PSA Forum kahapon, may napatunayan ang Azkals nang dominahin ang apat na bansang Peace Cup kahit wala ang mga tinitingalang Fil-Foreign players na dating sinasandalan para magkaroon ng disenteng resulta sa nilahukang torneo.
Nakita umano sa tagumpay sa Peace Cup na kayang manalo ang Azkals kung bibigyan ang mga manlalaro ng pagkakataon na makapagsanay ng mahaba-habang panahon.
Si Dennis Wolf ang siyang lumutang sa huling torneo nang angkinin ang Golden Boot Award sa apat na goals bukod pa sa pagsungkit sa Most Valuable Player award.
Ang iba pang may magandang ipinakita ay sina Matt Uy, Demi Omphroy, Jeff Christiaens at Patrick Reichelt.
“We will try to develop this team. All of them will play the UFL so there’s a chance we can have an intact team. They’ve already shown they can be relied upon,” wika ni Mariano.
Pero bukas pa rin ang PFF sa pagtapik ng mga Fil-Foreigners pero gagawin lamang ito para patibayin ang mga puwestong mahina sa koponan.
“We can still think about injecting two or three players from Europe. Players with top quality games who can easily jell with the team,” paliwanag pa ni Mariano.
Ang Peace Cup ay bahagi lamang ng paghahanda ng Azkals para sa paglahok sa Suzuki Cup sa Bangkok, Thailand sa Nobyembre. (AT)
- Latest
- Trending
