Team Balbona naghari sa PICPA chessfest
CEBU, Philippines - Mipatigbabaw ang Team Balbona batok sa laing pito ka koponan aron maghari sa Philippine Institute of Certified Public Accountants (PICPA) Invitational Chess Tournament niadtong weekend didto sa J. Centre Mall sa A.S. Fortuna street, Mandaue City.
Ang Team Balbona nga gibitoonan nilang Merben Roque ug managsuong Balbona nga sila si Felix Shaun, Felix ug Jessa mitapos sa lima ka hugna nga Swiss system competition uban ang 20.5 puntos aron mouli bitbit ang P10,000 nga ganting salapi.
Mipahiluna sa ikaduha ang Chess Infinitum human nila gipilde ang University of San Carlos (USC) pinaagi sa tie-breaker pinasikad sa board 1 results.
Nalandig sa ikaupat ang Skycraper Vital C nga mikutlo og 18.0 puntos, samtang ang ikalima hangtod sa ikawalo nga dapit nakuha sa M Team (15 pts.), OPASCOR (9.5 pts.), CEPCA (7.5 pts.) ug RP Mora (4.5 pts.). (BANAT SPORTS)
- Latest
- Trending
