Pink run gitakda sa Oktubre 20
CEBU, Philippines - Sa makausa pa, ipahigayon na usab ang Pink Run nga gikatakda sa Oktubre 20 nga manukad didto sa Pueblo Verde paingon ngadto sa Mactan Benito Ebuen Airbase sa Lapu-Lapu City.
Kabahin kini sa pagsaulog sa "Breast Cancer Awareness Month" ning bulan sa Oktubre.
Ang maong lumba gitambayayongan sa Aboitiz Land, Persimmon Plus, Pueblo Verde, IMEZ, ICanserve Foundation ug sa Eduardo J. Aboitiz Cancer Center, Kinetic Concepts, Philippine Air Force ug Rotary Club of Cebu-Fuente.
Si Ronaldo de Los Reyes sa Aboitiz Cancer Center, nagkanayon nga kini ang ikaduhang tuig sa pagpahigayon sa maong lumba diin laraw nila nga makatigom og pundo ug suporta alang sa ilang programa sa pagtabang sa mga kababayen-an batok sa gikahadlokang breast cancer.
Gilauman sa organizers nga mokapin sa 1,000 runners ang gilauman sa race organizers ang managan sa maong lumba nga gibahin sa 10K, 5K ug 3K categories.
Ang top three finishers sa 10K ug 5K makadawat og ganting salapi ug medalya.
Ang registration fee nagkantidad og P300 sa 3K ug 5K ug P400 sa 10K class libre na ang singlet ug snacks.
Niadtong interesadong mosalmot, mahimong magparehistro didto sa Persimmon Plus sa MJ Cuenco Avenue, Cebu City ug Pueblo Verde sa MEPZ II sa Brgy. Basak, Lapu-Lapu City. (BANAT SPORTS)
- Latest
- Trending
