4 teams respeto na lang ang habol sa no-bearing games
MANILA, Philippines - Pride na lamang ang paglalabanan ng apat na koponang maghaharap sa 88th NCAA men’s basketball ngayon sa The Arena sa San Juan City.
Sasalang sa ganap na alas-4 ng hapon ang Mapua laban sa Lyceum bago sumampa ang Arellano at St. Benilde dakong alas-6 ng gabi.
Wala na ang apat na teams na ito kung paghahabol sa puwesto sa Final Four ang pag-uusapan dahil ang Cardinals at Chiefs ay may 6-10 baraha habang bitbit ng Blazers at Pirates ang 4-12 at 3-14 baraha para malagay sa huling dalawang puwesto.
Pero inaasahang pukpukan pa rin ang tagisan dahil habol ng mga naglalaban ang magandang pagtatapos sa ‘di produktibong kampanya sa season na ito.
Parehong inaasinta ng Mapua at Arellano na mahigitan ang kartang hinawakan noong nakaraang season.
Ang Cardinals ay may 7-11 panalo-talo habang 6-12 naman ang naiposte ng Chiefs sa 87th season at kaya nilang lampasan ito kung maipapanalo ang huling dalawang laro.
Sa kabilang banda, walisin ang kanilang head-to-head ng katapat ang insentibong makukuha ng Blazers at Pirates.
- Latest
- Trending
