Azkals hari sa Peace Cup

CEBU, Philippines - Mihimo og kasaysayan ang Philippine Azkals human nila gisakmit ang kampiyonato sa Philippine Football Peace Cup nga maoy labing una nilang international title nga nadag-an sa koponan.

Ang Pilipinas unang nakakuha og titulo sa usa ka international tournament niadto pang tuig 1913 diin sila maoy goldmedalist sa Far Eastern Games.

Ang Azkals nga miduwa nga wala ang managsuong Phil ug James Younghusband mipakita sa ilang katakus dihang ilang gibuntog ang Chinese Taipei, 3-1, aron ma-sweep ang maong torneyo nga gipahigayun didto sa Rizal Memorial Football Stadium.

Ang Fil-foreign nga si Dennis Wolf kinsa mao usab ang yawi sa 5-0 nga kalampusan sa Azkals batok sa Macau niadtong Biyernes, maoy nangulo sa opensa sa Azkals ning higayuna batok sa mas lig-on nga Chinese Taipei.

Bisan pa og nahimong lopsided ang duwa, mipakita sa ilang kapisikal ang mga Taiwanese. Atol sa tunga-tungang bahin sa second-half, usa ka gamay'ng lamok-lamok ang mitumaw tali ni Azkals midfielder Demitrius Omphroy ug Lo Chi En sa Chinese Taipei.

Ang Azkals nangandam alang sa 2012 ASEAN Football Federation Cup diin milampos ang Pilipinas pag-abante sa semifinals niadtong tuig 2010.