Cuello daog na pud sa Mexico
CEBU, Philippines - Sa ikalimang higayun, napakita ni WBC silver minimumweight champion Denver Cuello ang iyang kusug atubangan sa mga Mehikano dihang iyang gikulata si Ivan Meneses sa kaugalingon niining balwarte didto sa Michoacán de Ocampo sa Mexico.
Si Cuello kinsa giplanohan nga paawayon alang sa world title sa sunod tuig midominar sa scorecards sa tulo ka judges 98-90, 96-92 ug 96-92.
Bisan pa og nagisian ang ibabaw sa iyang tuong mata tungod sa headbutt, isug nga nakigsinukliay og kumo si Cuello kinsa nag-apas unta nga mapatumba si Meneses.
Sa maong kadaugan si Cuello mipalambo sa iyang rekord ngadto sa 32-4-6, 21KOs, samtang si Meneses natagak sa rekord nga 18-11-1, 10KOs.
Didto usab sa Mexico, midaog usab ang laing Filipino fighter nga si Drian Francisco dihang iyang gipatug sa first round ang Mexican nga si Jose Carlos Vargas. Usa ka bangis nga left hook sa lawas ug ulo ang gibuhian ni Francisco nga maoy mipalup-og ni Vargas.
Si Francisco misaka sa rekord nga 22-1, 17KOs, samtang si Vargas nakahiagum sa iyang ikapitong pilde sud sa 21 ka away.
- Latest
- Trending
