UV nakatabla, 1-1

 CEBU, Philippines - Nakatabla ang University of the Visayas (UV) Green Lancers human maka-eskapo bitbit ang 81-79 nga kadaugan batok sa Southwestern University (SWU) Cobras sa Game-2 sa ilang "best-of-five" final showdown kagabii sa 12th Cebu Schools Athletic Foundation Inc. (CESAFI) basketball event kagabii didto sa  Cebu Coliseum.

Ang bag-ong napiling MVP nga si Hernal 'Wowie' Escocio  nanglimbasog og maayo ug ang daku niyang nahimo dihang iyang gihatagan ang UV Green Lancers og 80-78 nga labaw sa katapusang 13:3 segundos.

Ang guwardiyang si John Michael Abad mipasud og usa sa iyang duha ka free throws aron tabangan ang UV Green Lancers pag-eskapo.

Naglabaw og sayes puntos ang SWU Cobras, 72-66 gikan sa three-pointer ni Monbert  Arong, apan  gikalingawan kini og kitkit sa UV Green Lancers hangtod nga nailog ang labaw  paingon na sa kadaugan aron tablahon ang series, 1-1.

Si  Eman Calo Abad maoy topscorer sa maong kadaugan pinaagi sa iyang 19 puntos. Si Abad miabuno og 17 puntos, samtang si Escocio mikimada og 16 puntos. Ang ilang 6-foot-7 Nigerian import nga si Steve Cedrick Akomo mitampo og 10 puntos.

Si Arong maoy nangu sa SWU Cobras pinaagi sa iyang 28 puntos. Laing nakatampo og daku sa SWU Cobras mao sila si Benoit Mbala sa iyang 19 puntos, Bernie Bregondo nga adunay 12 puntos ug Bonifacio Guillena III nga miiskor og 10 puntos.

Ang Game-3 unya pa sa Lunes diha gihapon sa Cebu Coliseum. 

PUNTOS MATAG USA

UV (81) - Calo 19, Abad 17, Escocio 16, Akomo 10, Mendoza 6, Mercader 4, Silva 3, Oktubre 2, Perolino 2

SWU (79) - Arong 28, Mbala 19, Bregondo 12, Guillena 10, Nalos 5, Ortuyo 3, Aboude 2 (BANAT SPORTS)