Magis Eagles tuyo modagit og 2-0 lead

CEBU, Philippines - Human sa ilang makutas nga kadaugan sa opener, ang Sacred Heart School-Ateneo de Cebu (SHS-AdC) Magis Eagles tuyong moposte og 2-0 nga bentaha batok sa defending champion University of the Visayas (UV) Baby Lancers karong gabii sa Game-2 sa ilang "best-of-five" juniors division finals sa 12th Cebu Schools Athletic Foundation Inc. (CESAFI) basketball tournament diha sa Cebu Coliseum.

Samtang ang Baby Lancers gilauman nga mobangon aron matabla ang serye sa 1-1, apan mapruybahan kini sa ilang sangka batok sa Magis Eagles karong alas-5:30 sa hapon.

Ang Magis Eagles miiskor og 80-76 nga kadaugan pinaagi sa come-from-behind fashion, apan kinahanglan una nila nga bungkagon ang ilang 52-62 nga biya sa fourth period sa wala pa kini masalbar ni Arc Gabriel Araw-Araw, kinsa mipupo og 20 puntos.

Ang nag-unang kandidato alang sa MVP nga si Henric Dawn Ochea wala kaayo makahuygo sa Game-1, apan ang iyang mga free throws sa uwahing bahin sa duwa daku'g natabang sa Magis Eagles. Sa higayon nga mabalikan sa iyang naandang duwa si Ochea karong adlawa, segurong mameligro na sab ang Baby Lancers, ilabi na manginit si Jair Igna gikan sa iyang bugnaw nga duwa sa miaging adlaw. Andam sab sila si Miguel Competente, Fletcher Galvez, Felixbeto Jaboneta Jr. ug Arnie Padilla nga mosuporta ni Ochea. Naghangad sab ang Magis Eagles sa presensiya nilang Rendell Thomas Senining ug Giovanni Laguyo.

Sa habig sa Baby Lancers, ang reigning juniors MVP nga si Andres Paul Desiderio kinahanglan nga makakuha og igong suporta gikan sa iyang teammates aron matuman ang ilang pangandoy nga makatabla sa series.  (BANAT SPORTS)