Mayol napilidi, gi-KO ni Sanchez
CEBU, Philippines - Napapas ang damgo si Rodel ‘Batang Mandaue’ Mayol nga mahimong world champion pagbalik human siya tumbaha ni Mexican Juan Carlos Sanchez sa ninth round sa ilang sangka kagahapon didto sa Los Mochis sa Sinaloa, Mexico.
Sa taho sa boxingscene.com, si Mayol agresibo nga miatake ug maoy naglabaw sa scorecards sud sa pito ka rounds, apan wala siya magdahum nga mukalit paglagsik ang reigning IBF super flyweight champion nga si Sanchez ug mipaigo kini og makabungog nga kombinasyon nga mipatumba sa Cebuano boxer.
Grabe nga nabangug si Mayol sa maong pagkaigo, apan miaksyon pa kini og barug hinuon pakyas na siya sa pagtubag sa 10-count sa referee.
Sa maong kapildehan ang kanhi WBC light flyweight champion nga si Mayol nahagsa sa record nga 31-6, 22KOs, samtang si Sanchez mipalambo sa iyang record ngadto sa 15-1, 8KOs.
Sa laing bahin, nasugamak usab ang laing veteran Filipino boxer nga si Florante Condes kinsa napilde ni South African Hekkie Budler pinaagi sa unanimous decision alang sa IBO minimumweight belt.
- Latest
- Trending
