M. Lhuillier nabangog sa San Mig coffee

CEBU, Philippines - Wala magpanagana ang bisitang koponan San Mig Coffee Mixers (kanhi B-Meg Llamados) paglubong sa host M. Lhuillier Kwarta Padala-Cebu Niños aron moposte sa una nilang daog, 82-69 sa opening game sa 2012 Mayor Mike Rama Cup PBA Pre-season games kagabii didto sa Cebu Coliseum.

Igo lang milabaw og tres puntos ang San Mig Coffee, 23-20 sa first period, apan kalit nga miulbo ang ilang opensa nga nakapainat sa ilang bentaha ngadto sa 16 puntos, moposte og 16 puntos nga labaw sa halftime, 46-30.

Balanse usab ang opensa sa reigning PBA Commissioners Cup champion ubos sa pagpangulo ni two-time MVP James Yap, kinsa miposa og 14 puntos lakip na duha ka sunod-sunod nga triples sa third period alang sa ilang 20 puntos nga labaw sa iskor nga 60-40 sa nahabiling 1:49 sa maong kuwarter.

Gawas ni Yap, laing miiskor og double-figures alang sa San Mig Coffee ni coach Tim Cone mao sila si Peter Jun Simon nga adunay 13 puntos ug Cebuano rookie nga si Aldrich Ramos sa iyang 10 puntos.

Ang pilderong M. Lhuillier gipangulohan ni Jerick Canada, kinsa mirehistro og 15 puntos, samtang sila si Jan Colina ug Santos miamot og 11 puntos matag usa.

PUNTOS MATAG USA

San Mig Coffee (82) - Yap 14, Simon 13, Ramos 10, Reavis 8, Villanueva 8, Barroca 6, Ponferrada 6, Pingris 5, Gaco 5, De Ocampo 5, Pacana 2

M. Lhuillier (69) - Canada 15, Santos 11, Colina 11, Padilla 7, Saladaga 6, Cruz 5, Magsumbol 5, Magsumbol 5, Mondragon 4, Gatumbato 2, Dumapi 1  (BANAT SPORTS)